jueves, 16 de noviembre de 2017

Las mozas de Málaga


     Estas mozas tan serias nun son parientes nin amigas de la muyer. Estas rapazonas tan serias nun son amigas nin col.lacias del miou fíu. Estas mozas tan serias, a min, nun me conocían de nada. Foi’l casu que, de la que caleyábamos anteayeri per Málaga a la vera la catedral, –y entrugóu una al miou fíu que si–ys podía facer una semeya col sou móvil. Estas rapazonas tan serias entamanon a espaturrase de risa de la que yo, que tenía la mía cámara na mano, aproveche pa tamién saca–ys una foto ya por culpa d’ello asoleyanon nella tan sorrientes.

lunes, 30 de octubre de 2017

Soi Cangués

Vicente Prado Suárez, “El Pravianu”, nacéu en Viella (Siero) en mayu de 1964. Ía un de los más afamaos gaiteros, amás de los constructores de gaitas. Con namái 14 años entamóu a presentase a concursos. En 1989, empecipia la súa andadura como maestru de gaita. Tamién foi monologuista. Cuenta con bien de grabaciones en solitariu: -Ríu Verde (1987) -Viniendo de Maliayo (1998) -El Pravianu (2000) -Vicente Prau “El Pravianu” (2006) -Mano a mano (con Pepín Carbayos 2011) -El Pravianu toca y canta (2014), onde tolos cantares tan compuestos por él. Como se deduz d’esi caberu trabayu, El Pravianu canta al tiempu que toca ya darréu vamos sentilu en “Soi Cangués” nesti vidéu recién colingáu pola Nozal Groove.

miércoles, 18 de octubre de 2017

¡Malditos seyan!


 (Semeya de Salvador Sas pa l’axencia EFE)

     Asturias, Galiza, Llión ya Portugal nun queiman. A Asturias, Galiza, Llión ya Portugal–ys prenden fueu. N’Asturias, Galiza, Llión ya Portugal nun muerren los paisanos. N’Asturies, Galiza, Llión ya Portugal maten a los paisanos. A la fin, paez que decatánonse, o quixenon decatase, de que la mayor parte de los cientos de queimas son provocadas. ¡Norabona pol discurrimientu! Agora namái falta que garren a tolos culpables ya que paguen pola súa fechoría replantando las fazas amburadas con árboles de raigañu. Si hai que camudar las lleis pa torgar qu’esto se vuelva a producir, que se camuden, qu'hai bien d’años que tamos careciendo esta llaceria. Arriendes, de nuevu necesitáramos el sofitu celestial pa que nun arrasara cuasi tou. D’outra miente, siempres comenté que n’Asturias vivía la meyor xente del mundiu ya qu’a la escontra tamién pues atopar a daquién de la peor. Esa triba de bestias que nun tien un rispiu de sensibilidá, los que queiman ya los que manden queimar, nun son a algamar el sentimientu hacia’l próximu que pue tener un animal como’l de la imaxe, yá que pa min s’alcuentran nun pasu evolutivu inferior. ¡Malditos seyan! 

jueves, 5 de octubre de 2017

Constipáu de Tuña


Troxe un constipáu de Tuña
ya un furacu nel calcetu;
pel furacu, sal la uña
ya a la deda nun pon vetu.

Nun llevé la pañoleta
cola qu’arrodiou’l pescuezu
ya la garganta m’enceta
si nun l’aporto davezu.

Baxóu la temperatura
ya’l pañuelu quedóu en coche,
garrara ansí la malura
ya, d’esa visita, el broche.

Ando agora tusicando
ya sonando la mormera,
cola mormera sonando,
monto gran escandalera.

Lo peor ía cuando espirrio,
por culpa del españíu,
por alitar yá me pirrio,
enantes que venga’l fríu.

Ía que dempués nun sal
l’andancia del resfriáu,
nengún remediu me val
ya fino abondo alloriáu.

L’alcordanza d’aquel día,
nel pescuezu, remanez,
entamu de pulmonía
ya la napia que m’esfrez.

Lu meyor d’esti catarru,
ía qu’en Tuña lu garré,
foi asina, como lo narro,
con un furacu nel pie.

martes, 12 de septiembre de 2017

El tiempu ta llocu


L’airón con calima
tiróu’l balagar,
narquióu la facina,
foi tou a valtar.

Con esi aire ensuchu,
calecióu la pota,
se perdiera’l cuchu
ya aventóu la gota.

Trúxolu un nubeiru,
alla pel iviernu,
seique per xineiru,
na ponte l’Infiernu.

Pela primavera,
afitóu la seca
per tola fastera,
fasta en ríu, ¡meca!

Darréu, nel branu,
afogóu la viesca,
col prau a secanu,
espardióu la yesca.

L.legóu la seronda
ya al vientu del norte
apurrióu agua abonda
ya añagóu la corte.

El mes de los Santos
cubrióu la carril
carretando cantos,
dende Vi!!ouril.

El tiempu ta llocu,
paez Bangladesh,
ya’l vientu, sirocu,
el mundiu al revés.

martes, 8 de agosto de 2017

Xentu


     Aínda toi viendo a Paquín, el nenu de Rosariu de Casa’l Guarda, glayando al altu la lleva: ¡Ah ma, ah ma…, saliérame Xentu!, ¡mira que guapu!, al tiempu que-y amosaba a la súa ma'l cromu del estremu qu’andaba endolcáu na chicolatina de “La Cibeles”. Sí, seique pasóu más de mediu sieglu d’aque!!a ya entá m’alcuerdo como si fuera güei. El fíu de Rosariu tamién s’alcuerda de min: díxolu de la que me dexara aparcar delantre la súa casa fairá tres años, cuando baxáramos al Sacramentu a San Fliz. Agora ye abogáu ya tuviera un bon pedazu falando col miou fíu, Alvarín, que tamién lu ye. Ya’l miou fíu, anguaño, bien podría ser el pá d’aquel guah.e d’entós ya la vida anecia en dexame ablucáu; sicasí, contentu de qu’entovía me reconozan per esa querida faza. Mentanto, nun estoriu arrequexáu de la mia casa, Xentu se caltién sonriente porque yo tamién coleicioné los cromos d’aquel álbum ya en resultancia me farté de chicolate “La Cibeles”.

domingo, 23 de julio de 2017

El tatuaxe


     Hai cuantayá que Nora punxera un tatuaxe del sou mozu na pantorría derecha. Foi’l casu qu’esti manguán colara con outra d’Ibias habrá duas selmanas. Como consecuencia, la probe foi al tatuador a Uviéu a que–y  retiraran l’estampáu, pero esti–y alvirtiera que yera abondo caru de desaniciar ya nun quedaba mui curiosu. En resultancia, Nora caltién la imaxe d’aquel magüetu na súa pierna, magar que cola llectura amestada de “FÍU PUTA” que–y resultóu muitu más baratina.

jueves, 22 de junio de 2017

Finóu la tía


     Finóu la tía. Yá nun atropará más años nin asoleyaré nenguna semeya más d’ella. Púnxose mui contenta cuando centenares de vosotros la felicitarais pel sou 101 cumpleaños ya m’encamentóu contestavos. Atrás quedanon Ounón –onde naciera– ya Courias –au viviera de rapacina–. Los caberos años remaneciera na residencia del Carmen en Cantublancu, eiquí en Madrid. Sí, cuadróu que’l sou asilu nomárase talamente como la Virxe de Cangas. Quedóu apingayando dempués de la merienda soñando cola súa Asturias del alma, a la qu’aneciaba en cantar, ya yá nun espertara. D’esta miente, yá nun travesaré más la sienda de la devesa de Valdelatas pa dir a vela ya qu’afayé gracias a ella. Esi camín se m’abultaba aniciáticu; sicasí, magar que’l destín m’andara sopelexando recién, nun fui a camudar de personalidá nin a garrar siquier conocencia de min mesmu, calteniéndome tan burru como siempres. Como dicía’l miou suegru: pue que tea igua; lo de la probe pariente, yá non. ¡Adiós tía, viva Ounón ya La Veiguie!!a!

jueves, 1 de junio de 2017

Villarpadrid


     Esti poema ía d’hai tiempu, daquella escribía tanto n’asturianu como en castellán. Al venir a cuentu de Villarpadrid, voi dedicalu a Alexia ya tola bona xente de Villar.

 Llegar a Villarpadrid,
donde el silencio es eterno,
del estridente Madrid,
en verano o en invierno,

es volver a un paraíso,
de campechanos vecinos,
donde el tiempo está sumiso,
con los primos y “amiguinos”.

Te recibe, de soslayo,
a la subida de Gera,
en su ermita, San Pelayo,
tras dejar la carretera.

Los recuerdos de mis tíos,
el secreto de la fragua,
los serenos labrantíos,
el pozo de fresca agua.

La lágrima en la mejilla,
el hórreo que no envejece,
el olor a mantequilla,
la mente que se entristece.

Todo allí sigue presente,
la casa con los manzanos
mirando a Albar y Vivente,
los robledales cercanos.

El “chigre” que clausuró
con la partida nocturna,
la caricia que brindó
esa niebla taciturna.

La paciencia de las vacas,
el sutil llanto del carro,
entre graznidos de urracas,
a través de hierba y barro.

Memorias particulares
que agradezco haber vivido
a todos mis familiares,
también a los que se han ido.

lunes, 29 de mayo de 2017

Árbol xenealóxicu


     Esti ía’l miou árbol xenealóxicu en castellán. Nun ta mui curiosu por culpa la mia ruina conocencia d’informática; sicasí, bien pue valir p’atoupar dalgún pariente llonxanu más peiquí pela Rede. Cuasi que nun s’aprecian los nomes de los mious bisgüelos paternos: Manuel Rodríguez ya Estébana Álvarez, dambos dous de Vil.lauril de Sierra; asina como: Bernaldo Suárez de L.lugarnes ya María Celaya de Bual, polo que me plaz esclarialu. Si daquién de los qu’andáis pelas casas conceyu fora quien a aportar dalgún allegáu más–y taría abondo agradecíu.

jueves, 25 de mayo de 2017

25 de mayu


     Perdonái que nun festexe’l 25 de mayu. Nun me prestan las guerras nin que m'invadan; sicasí, viendo lo que ta careciendo ún día tres día ya escomunalmente —sobre manera nas grandes ciudaes—, de los que menos me fadiaría caltener a la mia vera serían a los franceses. Por culpa d’ello, toi más pola xuntura con Francia que con cualesquier miente de dixebra. Perdonái, tamién, los que nun penséis como yo.

domingo, 7 de mayo de 2017

Taba la miá ma

(Foto: José Luis Berzal)

L.lárimas d’alcacia,
de pan ya quesucu,
pelona ensin llacia,
de natura’l trucu.

Reciel.la de nenos,
fora iviernu ou branu,
yeran tous pequenos,
aínda más el nanu.

Baxan terremplenes,
sobra’l disimulu,
reutu ensin vaivenes,
esbariando’l culu.

El sangre en rodiya,
risáu na súa bouca,
folixa a la esbilla,
la pelota trouca.

Nada nun había,
sobraba maxín,
xugando tol día,
cuando rapacín.

Al esconderite,
quixi despintar,
la vida yá al quite
me foi a torgar.

La cai por trebeyu,
el tiempu pasó,
camudara a vieyu,
quien vos lo contó.

Tou a campu rasu,
remanez entá,
lu meyor del casu:
taba la miá ma.