Na residencia

     Güei fui a ver a la mi tía de Courias a la residencia vieyos de Cantu Blancu. Va yá pa 99 años ya bien de cousas se-y escaecienon; sicasí, nun olvida la súa infancia en Courias nin la súa Asturias del alma. En resultancia, escapao me mermuróu la lletra l’himnu ente llárimas: Asturias, patria quería. Asturias de mis amores… De la que la llevé al sou módulu ya-y daba un chuchín, una muyeirina que taba a la vera sorprendientemente m’espetóu: ¡Qué bien se va en burru! A lu que-y retruqué que yera verdá; magar que yo había bien de tiempu que nun montara en pullu por culpa la cerviguera ya porque, anque en Madrid haiga gran bayura d’ellos, enxamás me diera por-yos montar. Asina que toos rimos l’escurrimientu ya nos despidimos fasta la qu’entra.

ESCAYAOS

El "cura políticu" pide l'autovía a La Espina (LNE, güei, 1-12-2014).

     ¡Coime, como tien que ser! A l’occidente d’Asturias-y dexanon escaecíu ente unos ya outros. Cola autovía La Espina quedamos escayaos. Eiquí, como naide pide nada, tien que lu pidir el cura.

Uviéu ensin Black Friday

     Antón marchóu a Uviéu esta mañana pa mercar unos preseos, una estera ya seique, loción pal afeitáu (after shave, pa los que tais más preparaos). Foi’l casu que vieno reburdiando por culpa de que nun topóu’l que viera estos días más espublizáu, el Black Friday.

Pa esconsoñar

     

     Farruco fri las patacas con 20w50 porque diz qu’asina esconsoña meyor dempués de xantar. Foi’l casu qu’hai poucu tuvo qu’ingresar d’urxencia nel Severo Ochoa por cuenta de lu que se-y abultaba una afeición del apéndiz, pero nun foi ansí ya despachanon-y darréu pa casa camudando-y l’aceite namás. 

Un gabitu a Bertu

Bertu anda clamiando que-y echen un gabitu ya que daquién-y diga onde vive’l que colingara’l videu de calecer un cuartu con un tiestu y una vela. Foi’l casu que punxo a iguar l’esperimentu ya, pasáu un pedazu, españó-y el barru en milenta cachos ya un lu caltién espetáu nun güeyu. En resultancia, anda ingresáu, la casa ya la panera queimanon, a la güela dio-y un papurriu ya la muyer darréu marchara con outru.

Incomenencia

     Maruxa foi al mélicu por culpa de que pelas nueites tien que !!evantar muitas veces al escusáu pa nun derrocar na cama ya camentó-y que si nun taría entamando cola “impertinencia”. A lu que’l doctor-y retrucóu: non muyer, non, usté sigue siendo abondo educada.

De L.lumés

     Nun lu vais creer, pero conozo un paisanu de la parroquia L.lumés que tien un vinu tan granible que, de la qu’enfila, ye quien a coneutar colos sos parientes de Bonos Aires per vinuconferencia.

¡Prindanon a Viceroy!

Confírmase la detención del VICEROY en México (Na prensa de güei, 10.10.2014).

Nun faen más qu’enredar. Agora, si pie!!an la súa casa, ¿quién coime me va arreglar a min el reló cuando nun furrule?

Embriviendo

(Dibuxu, Maner F.)

Sres. Periodistas:

                           Fai cuantayá qu’ando ablucáu pola riestra mangantes qu’asoleyan tolos días entre políticos y empresarios que xulgan por corrupción ya por pañar de lu que nun ya suyu. D’esta miente, pémeque yá asemeya'l Cuentu de la Parrala ya que la xente paez qu’avezóu a esas fechorías y yá nin tarrez, ¿A la bonaz, nun sería meyor qu’espublizaran si queda dalgún que se salva pa nun aporfiar tanto cola tema?

¿Por qué nun me llevasti a Venecia?

       Sintió güei la muyer nel parte que casara Xurde Clooney en Venecia ─yo asítiome retiráu de la televisión pa nun esmolecer el cerebru─ y de secute m’entrugó: “¿Oi por qué nun me llevasti tu a Venecia de la que nos casamos?” Darréu ya ensin alteriame un plizcu-y retruqué; “Ai, nina, porque l’agua ta puerca, amorias (marías) nas barcas ya porque yo te llevé direutamente al Paraísu (Asturias)”.

Pol retrasu

     Virtú ye una paisana vieya d'Ibias que, como siempre taba apurada col llabor de la casería, en cuenta de tener un fíu tuvo direutamente un nietu y agora anda de discutiniu colos del rexistru por culpa de que-y torgan l’inscribilu ya la empobinan a los xulgaos. 

Calcicheiru

     Calcicheiru yera un paisanu d’un pueblu na raya La Puela que-y l.lamaban asina por culpa de que comía muitu queisu ya bebía l.leite ensin tasa lo mesmo p’almorzar que pa xantar o quitar la sede. En resultancia-y surtían cálculos cálcicos nel reñón, el fégadu ya la vesícula. Foi’l casu que-y mandanon facer un analís d’orín ya nun foi quien la enfermera porque se-y trancaban tolas xeringas de cuayáu.

VITAL

Un día, ensin dexar rastru,

colóu'l miou amigu Vital

del pueblín de Pontecastru,

camín de la capital.

La súa vida llabrador

 y actividá ganadera

quedanon nel parador

del Cuartu de la Riera.

Foi xofer de too artista

 afamáu del  momentu,

 mediu sieglu de taxista,

ente actores de talentu.

Llantóu berzas ya frutales

nestas campas madrileñas,

cebóu pitas en corrales

y caleyaba en madreñas.

Magar que perdiera’l norte,

nunca escaecióu Tinéu;

anque morréu eiquí na Corte,

pa min, enxamás morréu.

Pente comedias ya cuentos,

d’abéu, col miou paisanu,

 pasamos grandes momentos

nesti terrén castellanu.

Foi d'Asturias, un testigu,

pola xera y la cabruña;

Vital, el miou gran amigu,

de la Pontecastru Tuña.

Pegábamos la sapada

­

     Enantias, los mui señoritos falaban como nós. Agora, anden tan repo!!udos col sou aproximamientu al chapurriáu ya cuentan que son académicos. Sí, d’aque!!a, en Cangas ya en L’Acebo, los nenos nun “nos hacíamos daño”, mancábamos o nos pegábamos la sapada. Foi’l casu que, yá fai 56 años, asentamos tola parentela en de!!as mesas con bancos qu’afitaben pa merendar a la vera esi santuariu ya xantamos con verdadera folixa. Como entóncenes los paisanos apurrían vinu ya café a los nenos, pos yo papé un plizcu café puro —anguaño, dalgunos toman “café solo o con chuches”, sicasí, nós, bebíamos café puro—. Foi’l casu aparte que, a la escontra lu que suel soceder, a min el café me da sueñu ya, tras faer dalgún esparabán, quixi apingayar sobro’l respaldu que nun tenía’l bancu, cayendo pel terrén pindiu, mancando ya pegando la gran sapada. La mía xente m’asistióu con medrana; magar que, de la qu’agüeyanon que la mancadura nun yera gorda y alitaba darréu, la comedia quedóu n’alcordanza pala risión. Sí, asocedióu n’aque!!a dómina na qu’en Cangas los nenos se mancaban o pegaban la sapada.

FALAGUERU

Falagueru, falagueru,

¿qué-ys das col to afalagu?

Sólo un ramín de romeru

ya una alcordanza por pagu.

Si crucias la ponte,

nun caigas al agua,

que’l miou amor del monte,

na cabana, nagua.

Son de la cabana, son,

son del pueblín gayoleru,

qu’ensin la cabana’l don,

muerre’l llugarín enteru.

Si crucias la ponte

algama una cana,

que ta n’altu’l monte

l’amor na cabana.

Na braña Los Cadavales,

hai una xana llorando,

porque de tolos chavales,

namás-y gusta’l de Nando.

Si vas pa Balmonte,

trespanda la Fana,

que’l miou amor del monte

quedóu na cabana.

El corazón d’encantada

ía como un ramu d'espín.

Falagueru nun val nada

que reburdies pel camín.

Que na ponte Tuña

valten los traidores.

Curia, falagueru,

de los los mios amores.

Pistolu

     Pistolu yera un burru de los la montonera. Nun sobresalía por nada; en cuentas, yera gris de mente ya cuerpu. Mercóulu un paisanu de Surriba a outru de L.lugarnes habrá cuarenta años. Punxénon-y Pistolu pol alcuñu la súa casa. Trabayaba como tal ya folgaba, de la que-y dexaban, a los sos deleres. Sintióu falar asturianu a los sous amos de Sierra ya los nuevos de Tinéu; sicasí, él nun sabía, asina qu’enxamás espetóu a naide lu que nun yera. Ye más, na vida-y sentí reburdiar de lu que nun conocía. Si, yera un burru; anque, por embargu, nun yera un troleru. Magar que fora un pollín, él nun yera inorante. Por mor d’ello, tampoco yera insolente. Amás, Pistolu, siquiera foi neciu. Al nun ser inorante nin faltante nin neciu, nun s’engarriaba; colo que yo siempres-y tuvi mui bien consideráu. D’esa miente, cunto que Pistolu foi’l burru más célebre que naciera en Cangas.  

Nun sos de Cangas si...

     Espublicé na páxina de “No eres de Cangas del Narcea si…”, el 13 de xunu:

Nun sos de Cangas del Narcea si nun bebes l’agua nun xarru’l Mouru, nun chumes el vinu Tierra nun cachu ya nun conoces dalgún que tuviera de serenu en Madrid fai cuantayá.

     Retrucan que: “…ese no es nuestro bable, ni la forma de hablar de los pueblos de nuestro concejo…” [sic], aparte de dalgún contrasentíu que tuvi que desaniciar.

     Alderiqué: Quedo ablucáu:

Xarru: Un cacíu, una caramañola. Botijo ye foriatu.
Mouru: Topónimu de L.lamas el Mouru. Chumar: Beber
Cachu: Escudie!!a, cacíu [de madera, de barru de forma cóncava].
Cuantayá: (alverbiu) Va muitu tiempu.
Escaecer: Dexar d’acordase.
Refugar: Nun aceutar, nun querer.

L.l, l.l, !!: Representación convencional del soníu de la “ch” vaqueira.

¿Qué nun ye d’eiquí?, ¿Nun va ser que muitos nun saben como se falaba primero qu'entamaren a falar el castellán impuestu como propiu?

     Magar que, Carlos Lobato Fernández dixo: <<Nun entiendo que te fixesen un comentario en " no eres de cangas si....", que tu forma de falar nun ia, con lo que se falaba en Cangas. Penso que a xuventude, tien que voltar a sus orixes, como falaban os nuesos güelos. Encántame ver escritos y palabras de cuando uno era guaje y andaba por Courias. Yes un crak>>.

     

NA PICOROTA'L MUNDIU

EL NUEVU HUCA CURA ENANTES D’ABRIR

Un enfermu de próstata recibe l'alta por sorpresa de la que llevaba añu y mediu aguardando una revisión, ensin que-y vea'l mélicu ya ensin faese las prebas pidías (LNE, güei 25 de mayu).

¡MILAGRU!, ¡MILAGRU! Pa que llueu andéis reburdiando de la nuesa sanidá pelas cais. ¿Qué pensáis que son fatos tolos qu’anecian en venise p’acó?

X Festival de la Llana

Al mercáu d’artesanía,

has de venir esi día.

Nel Festival de la Llana,

vas quedar una selmana.

Anque seique, si nos ves,

vas remanecer un mes.

Eso ye lu que tien Tuña,

que garra na súa garduña.

Primer sábadu xunetu,

entre’l xaldu y el marnuetu,

pues vender o pues mercar

pues cantar o pues beillar.

Ente mozos ya paisanos,

ente mozas y artesanos,

bebiendo o escarmenando,

chando un pigazu o xantando.

Nuesu afamáu festival,

yá garróu fama mundial.

Nun escaezas l’envís,

porque vas llegar nun tris.

T’esperamos col enfotu

d’alcontrate nesti cotu,

cola folixa por xera,

nel Cuartu de la Riera.

Valir

     Fai falta valir pa deprender na bulla la ciudá ya tornar llicenciáu al paraísu bucólicu de la braña. Fai falta valir pa desandar los pasos de los nuesos padres ya güelos, volviendo tras las súas buelgas al secular abellugu. Fai falta valir p’aneciar pa siempres en días de la mesma condición; magar que se tea mui bien cerca del cielu. Sicasí, quiciás sía la postura más intelixente, somorguiar nesi aprovecimientu ya realcontrase cola redolada de los tos antepasaos ya, per ende, contigo mesmu. Benditos aquellos que son quien a empobinase puramente a los deleres de las súas querencias.

Queisos ya paleta

Tolino tuviera nuna escursión d’esas qu’espublicen per La Mancha ya, de la que tornóu, vieno con dous queisos ya una paleta ibérica. Foi’l casu que la paleta espabilóu y agora-y saca tolos cuartos.

Esperiencias paranormales

     Toi faciendo un estudiu d’esperiencias paranormales. A causa d’ello, vos estimaría m’apurrierais cualesquier casu abegosu al respeutu. De mano, muitas gracias a Milín de Bisuyu por empobiname la historia de Paricio, que tuviera 25 años siguíos xugando al tute con unos collacios de la mesma triba ensin decatase. De la qu’apaeciera pela súa casa, facía yá outros tantos que la muyer-y echara los responsos.

La procesión

Ramos y flores,

hai restallón

de voladores,

na procesión.

Carga la cruz,

el primer neñu,

sal a la lluz,

con cara sueñu.

Detrás el cura,

tres la santina,

daquién mermura

de la guapina.

Tamién el Cristu,

sal de la ilesia,

se prende’l mistu,

persigna Alexia.

Mandan parar,

rodiella a tierra,

vamos rezar,

la media berra.

La gaita suena,

suena'l tambor,

ente la truena

del volador.

Vieno’l foriatu

pa nuesa fiesta,

glaya’l más fatu,

s’igua la orquesta.

Torna na esquina,

mira’l mirón,

y yá se fina,

la procesión.

La planta

Fino de tornar del súper. Foi’l casu qu’una guapa moza ufiertóme una planta pa la mí muyer d’esta miente:

─¿Quier usté a la súa muyer?, !!eve-y esta planta.

Garré’l curiosu tiestu y acolumbré que valía 115 euros y aína lu posé a la vera los outros. Entós, l’aplicada vendedora m’espetóu:

─¿Qué ye, qué nun quier a la muyer?

A lu que darréu-y retruqué:

─¡Ai, sí, momina!; pero nun la quiero tanto.

El Payador

La fiesta de Santiago aneciaba en repetise cada añu ya los sous sones en esguilar fasta Vi!!ar de Xera pel va!!e’l ríu Vi!!averde. Los voladores españaban rebotando escontra’l monte La Berruga y avisaban del entamu la folixa mentanto paecían frayar el cielu col sou rescamplíu. Los mozos finaban apriesa de componese pa baxar aína y la !!amuerga ya los morrillos del camín emporcaban los zapatos acabante !!impiar. La re!!umada diba estazando en fileras de bombillas de la que t'averabas. L'aporfiador orbayu aportaba’l puntu románticu a la nueite y a los cantares de las orquestas. Un d’esos cantares quedara acutáu pa siempres nel miou oyíu de nenu, se trataba del Payador, que cunto qu'ía un valse pa danza. Seique yera una rancia orquesta, de xuru gallega, la que somorguiaba adulces la pieza ente los paisanos, el verde escuru de la redolada, los casetos de feria ya esas fileras de bombillas pelas que pingaba l’orpín. Güei, nesi “You Tube” nel que topas casi tou me foi imposible alcontrar daqué asemeyáu; sicasí, anque ensin la dulzura d’aquel grupu, amiéstovos una versión aínda más nueva —qu’a dalgunos-ys va paecer vieya abondo— d’una sorprendente tuna navarra onde se caltién malpenas la mesma lletra. Afayáivos ya sentíi la maxa d'esta composición.

El p16INK41

     Güei, agüeyé una noticia na prensa que me dexara ablucáu. Espublizaban qu’unos investigadores d’una universidá española afayanon por qué dexeneraban las frebas musculares amás que cola vieyura. Se trata de l’aportación d’unas proteínas nas células madre más vieyas que nun s’atopan nas nuevas. Tamos falando d’un refugador de la división celular, el p16INK41.

     Foi’l casu qu'hai unos años, de la que me cayera d’una zreizal ya frayé la pierna a l’altor de la llumera, yá me decatara yo de la esistencia del p16INK41 ya escribí un tratáu que sotitulé “Repercusiones del p16INK41 sobre los muérganos internos”. Magar que, nun voi poder demostralu por culpa de que foi uno de los archivos que se perdieran cuando s’esgoncióu’l miou ordenador. Sicasí, aquel estudiu taba ilustráu con esta semeya qu’asoleyo, na que, si tuvierais tan preparaos como yo, seríais quien a acolumbrar la presencia del tan amasuñáu p16INK41.

L'inglés

  

     Foime muitu bien el cursu audiovisual d’inglés que tuvi estudiando. Sicasí, a min l’inglés me resulta bramente abegosu yá que cunto que me falan mazcando un chicle. Anecio en dicir que me foi muitu bien, fasta que les frases entamaron a ser mas llargas. Entós, ya por culpa de lu del chicle, yá nun garraba más que la primera pallabra ya la cabera; asina que, mientras nun tiren el chicle, nun aporfiaré en deprendelu; amás, ta mui feu falar cola boca !!ena. Lu esclario por si tuviera siendo espiáu por dalgún “Güiquilís”.

La Candelaria

     Cuando la Candelaria chora, l’iviernu vei fuera; cuando la Candelaria ri, l’iviernu ta por venir. Que ría ou que deixe de rir, l’iviernu ta veníu ya por venir

     El primeru Febreiru, el segundu Candelairu ya'l terceru San Braseiru

     Un dichu yá mui vieyu cuenta que l'osu iverna fasta la Candelaria. Entós saca'l focicu de la cueva ya, si fai bonu, sal al monte a comer; ya, si fai fríu, hai nieve o'l cielu ta zarráu, torna al abellugu ya aporfia en dormir.

     En Asturias se celebra la Candelaria, La Candelera o Las Candelas en bien de parroquias; ente ellas, na de San Fliz en Tinéu, au naciera la mía ma.

El tren marcha p’atrás o se detién; los túneles de la Variante, anubiertos d’agua y l’autovía l’Espina, nin p’atrás nin p’alantre.

¡Que burru ía!

     

          L’outru día andaban de!!os vieyos amarraos nel parque, seique unos yeran del PSOE ya outros del PP. De sópitu, apaeció un paisanu col qu’enxamás falé, pero del que siempre me decaté de que fora mui burru. Aína-ys entamóu a riñir a tous: “Los vuesos esguimaron la caxa las pensiones, mentanto que los vuesos vos van faer pagar lu que los outros arruinaron, conxelando lu que vos pertenez menos el 0,25%, que vos van dar d’ engañifa de per vida. Unos ya outros atropanon los cinco millones de paraos. Los salarios tampoco xuben; magar qu’aporfian en encarecer tolos servicios. Sicasí, españóu la protesta por unas plazas d’aparcamientu reguláu en Burgos que diban camudar por un paséu ya ¿sabéis qu'ía un aparcamientu talu?, el que tenéis que pagar los de la contorna de la qu'aportáis pel centru; mientras los del centru, que viven nun sitiu más fino, aparcan de baldre cuando vienen pal to barriu…”

     Yá nun quixi sentir más nada ya marché escapáu. Que burru sigue siendo esti paisanu. 

Contentu

     Güei, toi mui contentu por culpa de que gasté bien poucu mercando nel Alcampu ya seique, de la que venga la muyer, nun me va riñir. Namái truxe duas cousas: un “pouf New Zealand”, que nun sé que coime ía, pero que lu garré pola mor de que valía mui baratu pala súa grandura, ya un artículu imprevistu na faza d’embolsáu, qu’esi nin siquier me decatara de lu que me cobranon. Perdonái que nun aporfie más en desplicavos puesto que yá ta picando a la puerta ya de seguru que tamién a e!!a-y va dar muita gayola.

Malvín

    Malvín yera un paisanu tan prudente que morréu por culpa de que la muyer-y tenía prohibíu surniar ya, como’l probe amás d’asma nun respiraba pela nariz, afogóuse.

     L’entierru saldrá mañana 9 de xineiru, a las 10,30 horas, del hospital comarcal Carmen y Severo Ochoa de Cangas del Narcea.

Clave de fondu

     El programa de Xuan brinda una melodía qu’esbaria abonda tristura. Ía uno d’esos sones qu’aportan la imaxe de dalguna prestosa moza cola que beilláramos hai bien de tiempu en dalguna fiesta de prau del nuesu queríu occidente ya de la que nun volviéramos a saber. Cuando tornan unos días p’Asturias, muitos nun dexan d’agüeyar la TPA. Yo tamién lu fixi asina ya, de la que prendí la televisión aquella nueite, sentí esi falagueru soníu en clave de fondu. Tras de Xuan ya del sou entrevistáu, afitábase un silente machu roxu. Enxamás viera ún de tala color; sicasí, toi bien seguru de que, al menos en suaños, esisten. Alredor, los llibros s’apilaban como morriyos nuna muria de cualesquier xoxa o corripia, o acaso de la parede d’un bayurosu castiello lletras, acoricando a los faladores. A manzorga, unas lluminarias caracoliaban fasta los altores y a man derecha, a lo fonderu, unas escaladas, a las que paezme recordar que-ys faltaba un pasu, esguilaban abúltaseme qu'a la gloria yá que nun s’acolumbraba’l sou cabu. A esa gloria na que tábamos de nenos ensin cavilgar más llonxe de lu puramente necesariu. Alcordéime d’aquella de las postreras que xubí, del pasu que fendióu, que bien pudiera ser el que-ys faltaba, ya de la sapada que peguéi ensin milagrosamente frayar nada. Seique, adulces, finara’l programa de Xuan mentanto yo esnalaba pel pasáu y, a llombu l’alcordanza, entós yo me di la media vuelta ya colé col mesmu sol de la que morréu la tarde…