Por culpa la tensión

    

     A Xuacu-y obligóu la muyer a dir a Urxencias por culpa los mareos que carez. Foi’l casu qu’aprecianon que tenía una tensión desaxerada; sicasí, Xuacu anecióu en nun tomar el tratamientu que-y apurrían. Darréu, el mélicu denunciara nos xulgaos la súa mala zuna por culpa’l peligru que representaba. De resultas, la cabera selmana, Sou Señoría-y condergóu a acarretar bien visible nel llombu la correspondiente placa de riesgu, nun fora eleutrocutar a dalgún guah.e.

Occidental perfeutu

 

Fora en San Pedru Culiema

onde surdióu esa muyer,

onde apaecióu esa fema,

onde se dexara ver.

 

Seique vieno del pasáu

ya yo de la capital,

paróuse un cachu al miou llau,

falando n’occidental.

 

Nun occidental perfeutu,

de nuesa melguera fala,

ablucara’l miou trayeutu,

nunca viera cousa tala.

 

Remaneciera en presente

p’andechar güei nesa guerra,

escontra un futuru ausente,

al que la !!ingua s’aferra.

 

Benditos seyáis falantes

d’esa ayalga que resiste,

pantasmas de los d’enantes

vos aporten qu’entá esiste.

 

Abasna como escolanciu,

pero nun va soltar prienda,

nun la va falar un ranciu,

magar qu’ensin él alienda.

 

Porque aínda se caltién,

como occidental perfeutu,

polos paisanos de bien,

por aciu d’un pautu reutu.



L'enanche de Tinéu

(Semeya d’una vecina de Murias)

 

 

 

 

A las Campas de Tinéu,

arrodiaba una muralla,

del Fontán a onde se reza,

curiando una fortaleza.

Yá ensin torre nin talaya,

la torre pierde’l balcón,

anque en balcón nun s’afaya

quien roba’l miou corazón.

 

L’enanche con mal caréu:

na muralla qu’estrapalla,

al llombu de la estrañeza,

cola medieval nobleza,

la torre tamién argaya

col balcón al fondigón,

sobro la muyer qu’ablaya

en robame’l corazón.

 

 

Denuncia

     Entrara’l xueves pasáu a abrir una cuenta nuna caxa d’aforros ya, de la que cubriera l’emplegáu los papeles, m’entrugóu que si quería disponer de dalguna tarxeta.  Aína-y retruqué que sí, que quería una “black”. De secute amestóu qu’había tiempu que las desanicianon, a lu que-y alderiqué qu’a outros se las apurrienon ensin torga cuando había cuerda pa Ratu ya agora a min tenían la pouca vergoña de me la refugar. De resultas, colé pal Bancu d’España pa llanta-ys una denuncia por agraviu comparativu.

Con esi mandilín

 

Con esi mandilín, nena,

ya esa saya de crespón,

los mozos son alma en pena

dende Cangas fasta Ounón.

 

En Casares nun me caso

con nenguna casadera,

que teo dormío al raso,

sa!!ando una cebou!!era.

 

Casé cola pendeixona,

porque me caía la baba,

anda feita una bribona,

nin se peina nin se !!ava.

 

Dite un beisu nel foucicu,

tu m’emburriasti p’atrás,

marchate col Pataricu

qu’a min nun me vas ver más.

 

Esbarié pal ríu Narcea,

somourguiara al mesmu fongu,

m’agabitóu la más fea,

remaneciera en Tubongu.

 

Seique fora una comedia

al nun !!evar inalámbricu,

nun m’aida multimedia,

soi como un paisanu’l Cámbricu.

 

Comiera figos en Courias,

pegóu la cólica en Cangas,

cisqué ensin querer de fourias

a una pareya pendangas.

 

Dibas col mandilín pintu

ya esi dengue derrangón,

nun pudi afloxar el cintu

nin na campa El Regueirón.



 

 



Xuacu

   
     Xuacu ya un paisanu mui duru de la parroquia Maganes al que-y paecían febles los cacharros de xinebra ya seique entamóu a chumalos de Fairy. Foi’l casu que-y ingresanon la selmana que fina nel Huca por aciu de lu qu’asemeyaba un cólicu ya de la que m’enteré colé darréu a visitalu. Como nun lu acolumbraban per nengún cuartu, tuvi qu’entrugar na Inspeición, onde m’esclarianon que lu empobinanon d’urxencia a la llavandería por culpa las pómparas.

Al Caribe

     Alcontréme con Colás esta mañana ya seique marchara enfocicáu conmigo. Foi’l casu que m’espetóu que diba salir una selmana pal Caribe ya darréu-y entrugué que si tenía familia per ei!!í. De secute rezungóu que non, que diba por bañar en dalguna sablera. Entós yo-y alderiqué que si taba pasáu al colar tan llonxe, yá que tenía sitiu abondo en cualesquier del Cantábricu qu’andan agora medio vacías. Nun-y dixi nin más más nin más menos ya’l mui repunante anoxóu conmigo.

La cruz

    Güei tuviera cita cola enfermera —namái na consulta, nun penséis mal— qu’al poucu d’entrar espetóume: Pin tas como una rosa, el tou analís nun amuesa nenguna cruz. A lu que-y alderiqué: Ai nina, la cruz !!évala ún per dientro ya por culpa d’e!!o nun yes quien a vela nesa preba.

Domingu

     Domingu, el de ca la Ventolera, anda creíu que tolos domingos son días del sou santu ya, como ía mui neciu, naide-y quier contradicir. Amás, como siempres ta carpiendo ya espirriando, esclaria a tol mundiu qu’aforfuga por culpa de que cuando naciera a pouco-y afuegan col cordón “dominical”.

A cuenta de lo de Xintu

 

 



A cuenta de lo de Xintu,

el de la entrada pasada,

díxome, como si nada,

que nun desabrochóu’l cintu.

 

Que sería manfloritu

—anecióu col so monólogu—,

el que-y tocóu d’urólogu,

ya escapóu d’ei!!í’l benditu.

 

Xintu cumplióu los 60

ya gasta radiocasete,

nel sou 127,

por culpa que-y trai cuenta.

 

Merca cintas en Xixón

al amu d’una ITV,

ía un soporte que nun xube

ya pasa la revisión.

 

Porque ía bon conductor,

por siguir dando-y al “play”,

al urólogu nun vei

yá más col reproductor.

 

http://pindesierracangas.blogspot.com.es/2012/06/pa-revision.html

San Xuan

     L.legara la rousada de San Xuan ya, como nun teo horru, nun lu pudi enramar; sicasí, los vecinos sí qu’enramaran la fachada la casa con pancartas ya cartelos escontra la gasolinera del cientru comercial por culpa que la cola coches torga dacuando en vez de salir del nuesu garaxe. Como faigo davezu, queimé lu nuevu ya quedé con tolo vieyu. Non, nun penséis que m’enguedeyara, ya’l casu que como lo antiguu val más pos siempres amburo lu recién mercáu. Seique la maxa de la mañana nun la sintiera sinón fora porque m’atopé con un de Grau enantes de las nueve; asina que bien seguru que tendrá daqué que ver. D’outra miente, eiquí en Madrid, debió armar fougueras una montonera xente yá que nun soi quien a salir a la cai por culpa que ta la tarde bramente arroxando.

¡Hai que rozar!

Agabitando a la mi prima de Vi!!ouril de Sierra…

Gobernante, nun hai camín,

faise camín al rozar.

Al rozar faise'l camín,

y al tornar la vista atrás

vense aquellos camineros

que rozaben pa pasar.

Gobernante nun hai dineros

dempués que vos fui a votar.

 

     Per munches/muitas carreteres ensin rozar d’Asturies/as malapenes cueye un coche. ¿Cómo va dir un paisanu que nun lu tea, d’un pueblu a otru, sinón ye xugándose la vida per elles/as?, ¿Cuántos accidentes podríen evitase namái qu’enanchando-ys con un cachu cuneta?

 

Dolcenu Festival de la L.lana

Dolcena edición del Festival de la L.lana

 

La dolce, dolcena,

!!egóu’l Festival,

refuga la pena,

finxu nacional.

 

El dos de xunetu,

endolca la !!ana,

un alcuentru netu,

fila la paisana.

 

Como siempre en Tuña,

¿dónde diba ser?,

ven a echar la uña,

qu’abondo hai que ver.

 

Mercáu artesanu,

foto esposición,

el vaqueiru ufanu

ya la receición.

 

Muitas filanderas,

bien d’asociaciones,

muyeres melgueras

colas tradiciones.

 

Repartida’l bollu,

nel centru social,

un menú de choyu,

postre y principal.

 

Dempués el proceso,

pela tardiquina,

col tosquiláu neso,

tiñíu con enclina.

 

Tras l’escarpenáu,

podrás varixar,

seique habrá filáu,

premios, al finar.

 

Darréu, la fiesta,

na nuesa verbena,

aventa la desta,

ven a la dolcena.

Sandín

(Semeya, Diariomotor)

     A los qu'andabeis preocupaos pol paradoriu de Sandín, namái informavos que lu ingresanon el vienres pasáu nel HUCA, nel cuartu 318. Foi’l casu que mercara un “Citroën Captus” de segunda mano ya espetóu un escayu nun güeyu.

Cita

Ayeri entamé a marcar el númberu de la centralina del miou centru de salú a las nueve ya diez de la mañana. Atendienon la mi chamada a las 19.35 p.m. (puta madre). –Y camenté a la rapaza que descolgara’l teléfanu que chamaba pa pidir una cita. E!!a me retrucóu darréu: “Vive como si fueras a morrer mañana. Depriende como si fueras a vivir siempres”. –Y di las gracias ya, en resultancia, nun voi tornar a nenguna de las revisiones del hospital ya nin siquier a perder outru día ya los nervios intentando la conexón col miou centru de salú pa que me dean outra cita previa.

Los rapacinos daque!!a

(4 hermanos de Cangas al rodio 1920 - Foto, a traviés de Tous pa tous: Benxamín R. Membiela)

     El miou pá ya los sous seyes hermanos nacienon toos al rodio del entamu’l sieglu XX en L.lugarnes ya Ounón (conceyu de Cangas de Tinéu). Los mozos de la semeya (foto) bien podrían ser dalgunos d’ellos yá que son del sou tiempu. Mirái como vistían ya calzaban asina como’l pie de manzorga de la rapaza más ruina. Al poucu, a un-y matanon los marroquinos. Na Guerra Civil, a outru, los nacionales. De nengún de los dous se conoz el pousadoriu de la súa cadarma. N’actualidá, namás vive la más pequena, que va pa 101 años, nuna residencia eiquí en Madrid, ya s’alcuerda abondo de la súa parentela ya de que si picaba na puerta’l conventu Courias un fraire-y apurría carambelos. Cuando fora’l sou centésimu cumpleaños, hai un mes, muitos de vosotros la felicitasteis. Foi’l casu qu’ablucara enforma de la que la selmana pasada-y tresmitiera tanta felicitación ya m’encamentóu ente llárimas que vos diera las gracias ya un abrazu mui fuerte.

AVISU

     Andái sollertes al facer la vuesa declaración d’esti añu qu’a Xuacu, qu'ía de Porciles pero que vive eiquí en *Tetuán, yá-y manganon 500 euros de multa por nun meter los 5 céntimos que-y apurriera’l bancu d’intereses ya outros 500 por mandar que la cubriera un abogáu de caleyas d’una cai de Panamá. D’outra miente, al que me quiera invitar a una sidrina a cuenta l’avisu nun se la voi refugar.

*Tetuán ía un distritu de Madrid, homónimu de la ciudá marroquina, magar que con muita población magrebina.

¡Viva Ounón ya La Veiguie!!a!

(Foto de Tous pa Tous)

     ¡Viva Ounón ya La Veiguie!!a! Esi dichu yá lu sentía yo dicir al miou pá hai cuasi 60 años. En Ounón naciera la mi centenaria tía María, magar que los sous hermanos lu fixenon en L.lugarnes, ya como sabéis viviera en Courias ya tamién en Siasu cola mi güela. Fairá 40 años, un paisanu mayor que s’alcontraba na casa del entós teléfanu públicu s’alcordaba perfeutamente d’e!!as ya de la casa na que vivienon, que cuento que yera la primera qu'atopas a manzorga de la que xubes d’Ounón. Sí, daque!!a dicíanse bien de dichos.



Centenaria

       La mi tía María naciera n’Ounón ya güei cumplióu los 100 años na residencia vieyos de Cantu Blancu, eiquí en Madrid. La mi tía María foi la más pequena de los sous hermanos ya'l sou pá la tuviera de la que cumpliera los 60. La mi tía María nun escaez la súa infancia en Courias, cuando picaba na puerta del monasteriu ya un fraire-y espetaba: “Yá vienes a por más carambelos”. Güei-y armanon daqué de folixa ya outru internu-y tocóu el “Cumpleaños Feliz” con una trompeta. Darréu, recibiera una montonera regalos ya, pela tarde, la visita d’unos gaiteros que-y emocionanon abondo. La mi tía María anda despistadina, lu que nun-y torgóu de cantar el “Asturias Patria Querida” al altu la lleva. La mi tía María vos apurre alcordanzas a tolos asturianos, sobre manera a los del sou Partíu de Sierra.

En La Casera

Tantos años pasando per Soutu ya nun fui a entrar en La Casera fasta esta selmana de Pascua, ya eso que Manuel Angel m’apurriera la solicitú d’amistá yá hai bien de tiempu. D’outra miente, abúltaseme que trabucara a la súa muyer con outra paisana de Tuña. Espero que me seyan a perdonar…

Mui bien cerca’l Ríu la Fame,

hai un paraxe del Cuartu,

cola térmica al algame,

au vas salir bien fartu.

Del Narcea, a la súa vera,

en baxando de Tinéu,

vas topate “La Casera”,

onde xantarás d’abéu.

Nesti ablugu’l mesmu arciu,

va recibite Manuel.

Una moza de Combarciu

tien de camarera, él.

Casera ía la cocina,

como’l nome del mesón,

la cocinera, d’enclina,

y el comedor, bon salón.

Pues pidir vinu de casa,

d’igual miente, platu’l día,

o arreventar, ensin tasa

ya pasiar pela chouría.

Pues cubrir la Primitiva,

al empar, la Bono Loto,

echar afuera un Cohiba

o beber vinu del boto.

Si te plaz venir en coche,

afayáu ta’l combustible,

o, si quies llenar el boche,

l’Alsa ía valoratible.

Yá qu’eiquí tien la parada

y al llau hai gasolinera,

nun esqueizas, tras Pousada,

arrequexar na Casera.

La Monxa

     Facía bien de tiempu que nun agüeyaba a una monxa col sou hábitu ya güei la fui a ver de la que caleyaba per Madrid. Abúltaseme que sería de las de la Caridá yá que nun me pidiera nada y arriendes me regalóu la prensa. Enantes, sí que se vían de bien de congregaciones; sicasí, agora paez que nun tan bien vistas ya nun sos quien a acolumbrar a nenguna del país. Ía verdá que s’afitanon cientos de miles, pero son de la cofradería del Magreb que da la impresión de que tan meyor aceutadas. Foi’l casu que nun-y besé la mano por si un acasu yá nun fora costume o por mor de que, al nun ser vieya, nun fora madre. D’outra miente, de sutaque-y fixi una semeya cola fin de que nun se decatara, nun-y fora a fadiar, al envís d’asoleyala eiquí nel Feisbuc en cuenta de que dalgún incrédulu nun me creyera esto que vos cunto.

Pa fiase de los mélicos

     Pa los qu’aínda nun lu sepáis, al probe Inocenciu lu ingresanon nel siquiátricu por culpa’l sou mélicu. Foi’l casu que’l doctor lu riñóu por cuenta'l banduyu que tien ya-y mandóu que s’apuntara aína a un ximnasiu pa qu’endelgazara. Inocenciu asina lu fixo ya de la que !!egóu al ximnasiu s’alcontróu con una montonera aparatos que nun viera na súa vida. El que más-y chocóu foi un nel que la xente andaba o corría ensin mover del pisu. A causa d’e!!o, xubióu al que quedóu vacíu ya, por mor de que siempres foi mui prudente, nun entrugóu a naide por como furrulaba. Entamóu a calcar na botonera ya ¡chachu, aque!!o nun se movía! Abultóuse-y que fallaba dalgún contautu, colo qu'apertóu afarto ya ensin retirar el deu d’una de las teclas. En resultancia, la cinta entamóu a esbariar a tou meter de sópitu ya l’infeliz d’Inocenciu salióu aventáu de culu, frayando la cristalera ya valtando pal Mercadona d’embaxo. Cola cadarma seique tuviera suerte, yá que cayóu nel montón de las naranxas; sicasí, cola tiesta pegóu  nel cantu de metal del contenedor ya emprincipióu a ver dinosaurios ya outras a!!ucinaciones polo que sigue en observación nel xurásicu.

El 127

     Atopé esta vieya semeya de cuando’l célebre 127 amariellu que circulara nos años 70 del pasáu sieglu per toa Asturias. Entróu ya salióu per tolos puertos, incluyíos los de pistas de sable, y asitiaba davezu nas villas de Cangas ya de Tinéu. Amás, yera quien a rodiar permediando sobro los sucos de cualesquier camín, yá ensuchos, qu’alzaran los trautores nas tambascadas. Tamién me valiera bien de veces de xergón p’apingayar. Por mor de la matrícula —M 6500 BT—, el miou pariente de Surriba siempres andaba folixando cola mesma comedia qu’esfrutaba al altu la lleva: “muertos, 6500, burru, tontorolu”. Amestando’l “sigue pillando” qu’inventaba. Aquel afamáu 127 afogóu un repunante día de Santiagu nun hinchente dientro d’un garaxe madrilañu y yo finé tou esfardanáu.  

Nun ía cuentu

Esti nun ía un cuentu fadas yá que nin siquiera ía un cuentu…

Abúltaseme que foi pel Carmen del añu 77 del pasáu sieglu cuando fixéramos una escapada d’una selmana pel conceyu de Cangas del Narcea, un pariente llonxanu míu ya yo, nun 127 más avezáu a las pistas d’Asturias qu’a las mesmas cais de Madrid. De secute a visitar Munie!!os ya las brañas de Monasteriu, aquel día quiximos saludar a unos parientes tamién llonxanos en Tebongu ya en Robléu. Tocóu de mano Tebongu ya por culpa de ser l’outru familiar más allegáu d’esa casa yo me caltuvi esperando na puerta la ilesia, qu’aportaba ablugu baxo teitu. Taba embaecíu cavilgando cualesquier fatada y agüeyando pa las murias, cuando de sópitu la voz d’una moza m’encomendóu dir con e!!a pa con toos. Torné la cabeza ya, a contralluz como si fora una apaición, acolumbré la contorna de la moza que me falara, en biquini de cadril p’arriba —lu que nun yera mui corriente atopar entós pelos pueblos—. Magar que quedé un plizcu plasmáu, azorroné pa que nun se decatara ya l’acompañé a la súa casa. Ayeri, afité un comentariu a una amiga del Feisbuc, perbaxo una semeya qu’asoleyara de Tebongu, ya inxente me retrucóu entamando una parolada qu’un pedazu más sero desvelóu qu'e!!a foi la encantada d’aquel casu, de la qu’enxamás supi depués.

¡Qué cosas, que nun cuentos, asoceden nel Feisbuc!

Tres vaqueiras

Tres vaqueiras me namoran

na va!!ina:

Deva, Nora ya Telvina.

Tres vaqueiras apañadas

diban a coyer mazanas

ya topábenlas pañadas

na va!!ina:

Deva, Nora ya Telvina.

Ya topábenlas pañadas

ya tornaban ablucadas

colas colores nevadas

na va!!ina,

Deva, Nora ya Telvina.

Trés vaqueiras tan !!ozanas,

diban a coyer mazanas,
tan curiosas, tan ufanas

na va!!ina:

Deva, Nora ya Telvina.

Ya alcontrábenlas purgadas,

ya tornaban a!!ouriadas

con colores camudadas

na va!!ina:

Deva, Nora ya Telvina.

Díxi-ys: ¿Quién sois, muyeres,

amas de los mious quereres?

Vaqueiras, camín de Tueres,

na va!!ina:

Deva, Nora ya Telvina.

¡Nun m’andar cafiando!

     De la que la familia andaba enredando nestas fiestas ya cola intención de nun tirar unos botes de pintura que se taban perdiendo, tuvi nun tris pintando esti cuadrín que vos amueso al envís de que vos preste. Si vos peta, ser un plizcu condescendientes ya nun me saquéis muitas faltas.