Dichosu mes

     Un de los refranes favoritos del miou pá lu dexaba cayer per estas fechas: “Dichosu mes el qu’entama colos Santos ya acaba con San Andrés”. Ta perclaru que se refería al mes noviembre que ya fina, al que n’asturianu se–y conoz tamién por mes de los Santos, mes de San Martín, mes muertu o payares. Amestar qu’hai una montonera refranes que falan d’esti mes: “Cuando en noviembre trona, la collecha será bona”, “Tou noviembre guardáu ya na túa casa soterráu”, “Trenta días trai noviembre…”, "De los Santos a Navidá, o llover o xelar”, “El día los Santos, nieve pelos cantos; ya per San Andrés, a la túa puerta la ves”,  “Pelos Santos, nieve nos campos, ya per San Martín, nieve nel camín”, “El pan serondín, per San Martín”, “L'ayu fino, per San Martino”, “Per San Martín, l'ayu ya’l cebollín”, “Per San Martín, el trigu rubilín”, “San Martín tien un branu; amás de durar poucu, nun lu tien tolos años”, “En pasando San Martín, cola manta al recostín”, “Per San Martín, el cierzu por vecín”, “ Per San Martín, una mazana a cada rapacín”, “Tal día de San Martín, tal día de Santa Olaya”, “Hacia Santa Margalita, la lluvia, más que dar, quita”, “Per Santa Catalina, la nieve na cocina”, “De Santa Catalina a Nadal, va un mes cabal”, “De San Andrés a Navidá, un mes habrá, ya la vieya que bien cuntóu, tres selmanas atopóu”, “El qu'a San Andrés va ya allá duerme, nun mes va ya n'outru vuelve”, “Per San Andrés, riega los tous praos, que cebarás los tous gües”, “En llegando San Andrés, el vinu nuevu de Cangas, aneyu ye”, “El vinu per San Andrés, vieyo ye”, “Per San Andrés, semao ya por nacer”, “Quien quiera pan d'escaldada, per San Andrés la tendrá semada”.

     De matanzas de gochos o corderinos hai abondos; sicasí, nun voi aportar nengunu porque’l samartín aborrezlu muitu Pin.

Ye verdá ya nun lu niego,

del inocente gorrín,

porque nun soi martiniegu,

aborrezo’l samartín.

Culiema, focu d'aguilandeiros

     Nada nun había, nin siquier teléfanu o lluz eléutrica. L'aislamientu yera secular nos pueblos más separtaos del antiguu Partíu Sierra. Hai cuarenta años, falé con vieyos de la faza que me camentaban como pa dir a Uviéu n’outra dómina travesaban perriba les montes. La mayor parte de las casas nun daban pa tous ya namái que se caltenían nellas el meirazu ya la nueva, los outros hermanos tenían que colar. Nestas condiciones aguciábase l'inxeniu pa retozar de la que se podía. Los aguilandeiros fonon un de los escurrimientos común con bona parte del occidente d'Asturias. Güei, la valoratible aportación de Sergio Rodriguez, nos recuerda como San Pedru Culiema foi un célebre focu d'esas representaciones, nas qu'andechaban vecinos d'esa parroquia –na que naciera un de los mios güelos ya los sous pas– asina como d'outras de la redolada. Arriendes, asoléyanos dalgún personaxe nun habitual n'outras amazcaradas del llonxanu oeste, talamente como'l reloxeru, la mula, el muleru, la neñera col sou nenu, el xastre ya l'ánxel.

Cantarín d'aguilandeiros

     

     Yá qu'ía’l día de la música, col sofitu d’una estrofa tradicional d’aguilandeiros, encoplo outras seis de la mesma condición que–y amiesto pa iguar un cantarín.

Anxelinos somos,

del cielu vinimos,

bolsina traemos,

cuartinos pidimos.

Los aguilandeiros

llegan a túa casa,

son tous solteiros,

hai ún que se casa.

Vinimos de llexos,

de llexos vinimos,

xubiendo los tesos,

baxando caminos.

Saca l’aguilando,

señora pa nós,

vamos informando

que naciera Dios.

Para rediminos,

nacéu l’outru día,

en nome pidimos

de súa ma María.

Si esta ía gran casa

ya hai un gran señor,

bon bollu s’amasa,

que sal bon golor.

Danos l’aguilando,

lo que tea al algame,

tamos bocanando,

morremos de fame.

Ubicuidá

Nun lu vais creyer, pero yo conozo perfeutamente lo de la ubicuidá: soi quien a tar en Madrid ya n’Asturias al mesmu tiempu…