Pepiño, campeón.

¿De qué ye campeón Pepiño?, ye que sentí dalgo nel parte ya nun lu garrara dafeitu.

CANGALETAS

Güei, el Barsa, seique dio-y una bona tuenda al Santos. Paez que’l pitu (Neymar) ya’l Gansu nun picanon nin plizca. En Cangas hai una montonera xente qu’andará de folixa, sobre too los de la Peña’l Candil. Cavilgo que, con tanto culé, l’Ayuntamientu podría tresnar dalguna faza o camudar el nome a dalguna cai pol de “Cangaletas” pala so axuntanza.

CADABRES NA TABACALERA XIXÓN

Un equipo de la Autónoma de Madrid descubre la riqueza biológica de Tabacalera en Cimadevilla
Una colección con millares de ácaros y un mamífero ya extinguido procedente de Argel, los hallazgos más singulares del yacimiento... (Lne.es » Gijón / 11.12.2011)

L’alcuentru d’esta reciella animales na Tabacalera vien sofitar lu malu que ye’l tabacu, por si daquién inda tenía dalguna dubia.

Na prensa de güei, 4 d'avientu...

España, campeona de la Copa Davis
Nadal, que ha jugado infiltrado, se ha adjudicado el punto definitivo ante Del Potro... (Na prensa de güei, 4 d’avientu)
Perdonái, ye que nun sé de tenis. ¿Nadal nun ye titular?, ¿entós pa que xuega infiltriáu?

Las vaqueiras ya la tonada asturiana, Patrimoniu de la Universalidá

Tola prensa de güei espubliza que, dende ayeri, los mariachis ya los fados son Patrimoniu de la Humanidá. De la mesma mena que nel añu 2010 asocediera col flamencu, a la UNESCO-y plaz qu’agora los sones de raigañu de México ya Portugal seyan declaraos talamente.

Nesti sen, ya col enfotu de que muita xente s’amieste a esta andecha, güei, 28 de payares de 2011, porque asina me peta, amueso y declaro a la tonada asturiana y a las vaqueiras, “Patrimoniu de la Universalidá”. Yá ta. ¡Alón!

Robláu: Pindesierra
http://pindesierra.blogspot.com/

MUI APURAOS

Per eiquí pelos Madriles, la xente siempre anda mui apurada ya tou furrula mui depriesa. L’outru día apuntéme a un concursu de pintura rápida, sicasí nun fui quien a andechar por culpa de qu'enantes que sacara los pinceles yá-y apurríen el premiu a ún.

¡Oyes!, ¿ya las vacas?

Fai una montonera d'años, de la que s’alcontraben dous paisanos pelas cais de Cangas o Tinéu, entrugábense aína polas vacas. Los foriatos ríen esa ocurrencia. Agora, las cousas camudanon ya son los foriatos nas villas quien preguntan d’entamu pol sou trabayu. Nós sentimos lu que falen, pero nun rimos por culpa de que vamos ser enforma más educaos ya, ¡mialma!, seique falábemos de lu mesmu.

PA CORRESPONDER

Güei, Día los Santos, nel cementeriu L’Almudena de Madrid, xuntóse tal montonera
xente na vera una sepultura como enxamás se viera nesi campusantu. El fináu yera un paisanu Cangas que morriera anguaño, nel mes de xunetu. Esti home yera tan celebre, fonon tantos los familiares ya collacios que s’atropanon ya de tal mena'l xaréu que s’algamara, que'l difuntu —anque nun amosaba mui bon aspeutu— surtiera namái que pa saluda-ys ya, de secute, tornó pal furacu.

Arde Cangas del Narcea

Maldito, tú, pirómano maldito
que quemas el futuro de las gentes,
que abrasas animales inocentes,
que incineras el bosque en tu delito,

del que apenas escapa un pajarito.
Sufrirás por tus actos delincuentes,
las ascuas del averno incandescentes,
del concejo de Cangas, ya proscrito.

Doliente y escaldado el Paraíso,
privado el legatario de su herencia,
reclama nuestra tierra compromiso

de profuso cuidado, con urgencia,
de fértil vigilancia ultima aviso.
Obviar ya no es posible esta advertencia.

CORTEXANDO

Diendo a echate la presona,
nun te vi nel estragal,
agüeyé na to casona
ya perriba del pidal.

Tancada la galería,
tan guapamente’l voláu,
nun calcasti la l.louría,
nin foras por ceba al prau.

Contaba dir a la braña
con Bernaldón, el vaqueiru,
p’aventar la baragaña,
que garra de vecindeiru.

Mas tal muxu murador,
ante’l casu revesosu,
espere con más remor
qu’el pitu amuesa’l raposu.

Tando yá mediu rabión,
con más que fame, quemona,
encuallóseme un torción
al nun empatar la cona.

Ente tanto amofamientu,
columbré pala panera,
¡ai de min! ¡qué azoramientu!,
col gadañu na to vera,

tabas col fatu d’Oreyu
falando caxigalinas,
agafé del enguedeyu,
llonxe de las melecinas.

Ya nun vuelvo a cortexar,
xopióme bien la mozcada,
que de xuru pa escarmar,
valió con esa boriada.

CASORIU ESFARDANÁU

Pa nun aldericar de casáu, maridé en Cangas con una moza china; ensin embargu, separtamos n’Uviéu al outru día por culpa de que nun nos entendíamos.

GANGAS del ESCAÑU

Qué bien duermo nel mio escañu
tolos días una siesta,
mes a mes, añu tras añu,
días de llabor o fiesta.

Antes de l’atapecida,
pa reposar de la xera,
cola cadarma rindida,
poso l’arca na madera.

De la que quedo inconsciente,
estiráu como una rana,
trespando pal occidente
de la mio tierra asturiana.

Esnalo la Sierra Loxa,
en xubiendo d'Argancinas,
ya col arume de troxa,
allégome fasta Ondinas.

D’eiquí voi a Couce!!ín,
travesando Sanguñéu,
baxo a Puela de camín,
que ta a la vera Tinéu.

De secute, anicio'l vuelu,
entaino al partíu Sierra,
na derecha dexo El Puelu,
pela manzorga, La Cerra.

Tengo falar a una fema,
que presta da-y al rabil,
ente San Pedru Culiema
ya’l !!ugarín de Vecil.

Al poucu de colar e!!a,
voi despertar a Valcáu,
tras rondar pela Veiguie!!a,
col mio sueñu esperezáu.

Asocede tolos días,
viaxo a Tinéu ya Cangas,
ensin pagar autovías,
son, del mio escañu, las gangas.

¡Gracias Tita!

Presta a esgaya tener amigos como Tita, a la que conozo dende nenu. Nesta soleya, amueso las fogazas ya la empanada que me regalara cuando tuvi nesti mes d’agostu en San Fliz. Arroxó nel so fornu ya amasó con trigu qu'inda semen unos paisanos de Sierra nel conceyu Cangas. De la mesma mena, amestó formientu de so. De la que comía, adulces, esti maraviyosu pan, trespandaba a otra dómina na que cada casa iguaba'l suyo propio. Ye lo que tien el progresu, adelantamos nunas cousas ya separtamos outras que nunca debieran escaecese.

EL CHINU QUE SOPLA GASOLINA

Tiene 71 años, consume combustible desde 1969... (LNE, 14 xunetu)

Ye lo que faltaba, col preciu que tien el petroleu, agora que-ys dea a los chinos por soplar la gasolina ya vamos tener que tornar seique al carru’l país.

TOLOS DEL MADRID NUN SON ASINA

Tengo un amigu que ye del Madrid, pero zarráu, zarráu. La tema ye que, si-y pinches un rispiu, calez y ponse a barrenar colos del Barsa ya espotrexar de los del Atleti.

Que naide cavilgue que camiento esto a causa de que pienso que tolos del Madrid son asina, que nun ye verdá. Los del Madrid son, d’esta miente, la mayor parte; seique, toos non.

ENSIN CADENAS

     Tando’l Connio con cadenas, a un paisanu d’Ibias que trespandaba’l puertu col sou 600, paró-y la brigadilla ya entrugó-y que por qué nun las punxera. L’home retrucóu que nun las topara ya que-y dixeran nel chigre que facía cuantayá que nun lu vendían. Asina qu’echara nas gomas un plizcu de l’Asturiana que se-y abultaba tan bonu o meyor que l’outru y amás yera del país. Nun pudiendo parar de rir pola ocurrencia, la parexa nun foi quien a prindar al tixileiru que marchara tan campante cavilgando que los de l’autoridá taban en chancia.

L'home d'Atapuerca pesca nel Narcea

L'home d'Atapuerca pesca nel Narcea

Xuan L.luis Arsuaga, codireutor de las escavaciones burgalesas, intentó ayeri, ensin ésitu, prindar el so primer salmón nel pozu El Morenu ya aprovechó pa pidir el cuidu del ríu... (LNE, 22 de mayu)

Cola montonera xente qu'hai pescando nel Narcea —una truita por cada tres pescadores— ¿tienen que venir tamién los homes d'Atapuerca?

La boda’l sieglu

¡Nun m’ importa un güevu'l casoriu de Guillermo y Kate!

Moza Bint Nasser

“El Mundo”, güei 26 d’abril:

...Na soleya, Moza bint Nasser, la xequesa más lliberal del Golfu Pérsicu ye recibida pol rei a pié d’avión...

¡Miánicas!, la xequesa Bint Nasser l.lamaráse asina; sicasí, nun fai falta sofitar que ye moza, pos si fora mozu sería'l xeque. D’outra mena, podía ser una muyer que s’amazcaráse d’home pa pidir l’aguilandu, pero paezme a min que nun ye’l casu.

ACORDANZAS DEL FUTURU

El trayecto entre Oviedo y Madrid será de 3 horas en 2013, según Trevín.

( LNE, 5 d’abril de 2011)


El trayeutu ente Uviéu ya Madrid va ser de 3 horas nel 2017, según Trevín.

Uviéu, 5 d’abril de 2013

¡A 110!

Topéme con Fonsu l’outru día ya encamentóme qu'andaba enfocicáu cola midida del Gobiernu de finxar la velocidá, y amestóme qu’a él pasa-y como a Alonso, qu'a 110 quilómetros per hora, apingaya. Entós, retruqué-y: Pero home de Dios, si tu cola to “apnea” duermes tamién a los 120 ya los 130, ya cualesquier velocidá. De secute, Fonsu, caleció y aldericóme: ¡Ye verdá; magar qué, a 110, atronco de xuru!

El collaciu de Tebongu

La cabera selmana visité a un collaciu de Tebongu que yera mui deportista ya facía cuantayá que nun lu vía, ya quedé ablucáu por culpa de que’l probe home taba mui desmeyoráu. Dicía qu’agora nun sortía pelos cordales nin pelas pistas, que mercara una bici ya pedaliaba nel so cuartu. Entós, amosómela ya ¡mialma!..., ¡nun tenía ruedas nin galga! ¡Coime!, pase que nun montara frenos, porque al nun movese nun diba a esbariar nin a dar la sapada, pero ¡que nun tuviera ruedas!

Colé anoxáu dafeitu por culpa de lo pasáu que ta’l probín del mio collaciu. Ye que la edá nun perdona.

TA TOU PAGU

Xuacu ye un paisanu Mieldes que mercó un pisu al contao en Cangas, refugando las facilidades que-y ufiertaron, y agora anda denunciando a la constructora por publicidá engañosa. Seique, !!eva más d’un añu amarráu n’Audiencia. Aldericó nel xulgáu que la puerta ya'l so furacu tienlos bien pagaos, qu’él enxamás dexa nada a deber, ya que la sociedá porfia, nuna publicidá qu’agüeyara, que las viviendas vendiéronse ensin entrada. De la mesma mena, fincó otra denuncia a dos funcionarios que rieran de la que punxo la primera.

A la chisba San Brás

Per San Bras, tien el día hora y media más.

Per San Bras, las patacas semarás.

Per San Bras, la tua yerba al mediu verás.

En San Bras, la cigüeña verás; si nun la vieres, añu de nieves.

San Bras ya la Candelera echan l'iviernu pa fuera si !!ueve o nieva, sinón acó queda.

Al que fila per San Bras, tórnase-y la hora p´atrás.

Al que fila per San Bras, tórnase-y la boca p´atrás.

Si nun nieva´l día San Bras, nieva outru día detrás.

El día San Bras comiendo castañes nun duel la garganta más.

Per San Antón la pita pon,
pela Candelera, la nueva y la vieya,
y per San Bras, más y más.

Pela Candelera y San Bras l’iviernu botarás,
y si San Bras nun quier, l’iviernu volverá.

Andái, mozas, a San Bras, que romerías nun hai más.

AMUESA D'HÍBRIDOS

Censan a 200 ejemplares de oso pardo en el Cantábrico
Entre las principales conclusiones resaltan el aumento del tránsito de ejemplares entre la población occidental y oriental y la aparición de híbridos...
(La Voz de Asturias 23-1-2011)

Presta columbrar que l’osu seya tan intelixente y tamién, nesta dómina de cris, afáyase col nuevu modelu “híbridu”.
Pindesierra

CANGAS del NARCEA

De la Folgueira al Cabril,
del Mosqueiru al Mariscal;
el más grande, el más sutil,
un conceyu ensin igual.

Fuimos Cangas de Tinéu,
quedara la cousa fea,
ser d'Asturias, camaféu,
ya nun lu ser del Narcea.

D'Argancinas a L.larón,
de Bisuyu a Xinestosu
anque nun !!ega'l salmón,
somos quien a esclucar l’osu.

El cielu nos sos capie!!os
un bon día quixo iguar
el nuesu monte Munie!!os
ya los cangueses, dotar.

El pirómanu grotescu
namái ve caza y madera
no que declara l’UNESCU,
Reserva la Biosfera.

Rutas, biescas ya verones,
cordales, va!!es ya ríos,
horrios, fontes, covarones,
la villa y los amoríos,

las caleyas ya palacios:
Toreno, Pambley, Omaña...,
apavorian los sos xacios,
ye almirada en toa España..

Estoupan atronadores,
entamando la descarga,
los milenta voladores,
pela folixa más !!arga.

Célebre ponte romana.
Crucia’l ríu, con talante,
a la plaza más ufana,
el nuevu pasu colgante.

Ye la ilesia parroquial,
basílica, declarada;
monumentu nacional,
por Valdés, acoricada.

El monasteriu de Courias,
“Escorialín Asturianu”,
resurdió ente las escorias
de las queimas del villanu.

Romería del Acebo,
nun te quixera escaecer,
cuido qu'en setiembre debo
a la Santina, ofrecer.

Xarros prietos, los de L.lamas,
Bisuyo’l de los ferreiros;
enxareyan colas ramas,
na Barguera, los cesteiros.

Col ensin par vinu Tierra,
brindemos con emoción,
pol sonáu Partíu Sierra,
arguyu de la Rexón.