El Cientudolce

     El Cientudolce ía un paisanu Courias que s’enfotóu en llantar un dispositivu lluminosu de serena enriba’l sou coche. Lo más chocante del asuntu ía que-y paranon más d’una vegada la Guardia Civil ya los municipales col envís de multalo; pero dexában-y marchar por culpa de que nun se decatara de que-ys entraba la risa. Foi’l casu qu'a la madre d'uno de los axentes de la Benemérita-y diera un derrame cerebral mui bien cerca de Xabita ya'l Cientudolce llevóula aína al hospital cola serena puesta y atravesando un atascu que s'entamara en Cangas. De resultas, el neurólogu-y espetóu al fíu que la súa ma salvara la vida namái que per un minutu. Agora, cuando’l Cientudolce circula pela carretera Cangas col rellumaor afitáu, la patrulla non sólo nun lu torga, sinón que s’afana en da-y pasu.  

Nun paga la pena

     Yo, non sólo nun xuego a la llotería, sinón qu’amás acacho los décimos que mercara la muyer (ensin que s’entere). Non, nun penséis que toi aventáu dafeitu, ía por culpa de qu’anque-y toucara’l gordu yá nun-y paga la pena lu cobrar con tanta tasa como afitaron ya porqué asina dempués nun te tienen agüeyáu.

     Por si daquién tien dalguna participación y quier siguir la buelga los décimos, pue ponese en contautu cola incineradora de Valdemingómez.

Los cuentos de güei

Figos en Courias, cagalera en Cangas

Carmen..., “ este es un dicho muy viejo... desde que tengo uso de razon siempre lo oi”

     Tien muita razón, Carmen. Ía un dichu mui vieyu. Yo, yá lu sintiera al mióu pá, que naciera en 1904, ya’l mióu pá sintiéralu al mióu güelu... Sí, daquella había bien de cuentos. Sí, daquella nun había tanta gandaya de televisiones. Sí, daquella tamién falaban asturianu. Güei, dempués de sotripanos a derecha ya manzorga, la nuesa prestosa !!ingua amorrenta. Mentanto, n’outras rexones o nacionalidaes de menor raigañu históricu, espoxigan las suyas. Un carráu de cuentos se perdienon, esi da’l nome a un cenciellu blogue pa que nun s’escaeza; sicasí agora tenemos outros cuentos: l'asturianu nun val pa nada, el bable de !!aboratoriu, deprendi inglés qu'ía más práuticu, eso ía de nacionalistas. Son cuentos pal esbarrumbe de lo nuesu. Son cuentos pa esi mesmu escaecimientu. Son cuentos pal desaniciu d’una cultura. Son cuentos de la perda de la nuesa identidá... Magar qu'inda remanecemos dalgunos mui burros qu’aporfiamos na defensa de los nuesos vezos, que nun somos nacionalistas, que nin trabayamos nun !!aboratoriu nin lu ficiera nengún güelu ya que somos quien a deprender amás outru idioma. Pa los qu’anecian en lu del !!aboratoriu, amestar que cuando nun hai unas normas, hai que las iguar p’afitar cualquier escritura; de mano, entruga ya informate, asina vas decatate de qu'ía mui poucu lu que dixebra al nuesu asturianu occidental del normativu. Nun refugues lo que nun conoces ya andecha nesa xera qu'ía la tuya.

Per Santa L.lucía

Per Santa L.lucía, mengua la nueite ya medra’l día tanto como la vieya espurre la pía.

Per Navidá, cualquier burru lu ve yá; y per Añu Nuevu lu acolumbra’l perru a güevu.

Más val prevenir...

     Yo, como toi crónicu dafeitu, entérome de bien de cuentos na consulta’l mélicu que dempués vos los faigo saber pa que teáis instruyíos. Ayeri mesmu sintiera a una vieya, que diba a entrar enantes que yo, dicir a outra qu'ella nun vacunaba escontra la gripe en cuenta que lu que meyor-y diba yera una píldora.

Mal aparcáu

Por aparcar el pollín,

mediu minutu n’acera,

mangánon-y el papelín,

y al probe-y dio cagalera.

Taba apegáu a la muria,

dexélu bien amarráu,

ía que te busquen l’aburia,

de la que tas descuidáu.

Nun pues baxar a la villa,

porque tan a la que salta,

el que nun roba, te trilla,

ya ‘l casu yá güel que valta.

Asina que, de resulta,

ayeri llegóu l’avisu,

de los cien euros de multa,

seique p’enllosar el pisu.

Sicasí, por prontu pagu,

me lu dexen en cincuenta,

de tan baratu, ía bagu,

d’esa miente, traye cuenta.

De la que pagara en bancu,

cavilgaba de regresu,

que diban sufrir atrancu,

si prindaran nel Congresu.

¿Enantes del fin del mundiu?

Europa va cofinanciar la meyora’l  corredor Palencia-Xixón ya'l sou tresformamientu n'AVE ...

20.11.2013 | 02:03 LNE

Uviéu, Xosé A. ORDÓÑEZ. La conexón ferroviaria ente Palencia ya Xixón ía unu de los proyeutos prioritarios de las redes transeuropeas de tresporte que van poder aportar a fondos comuñales nos próximos años ya que van deber de tar finaos enantes del... 2030.

¡Miánicas!, agora yá se va cucando’l ramu la variante, si enantes nun s’acaba’l mundiu...

L'Atrancu

     Casio andaba abondo cafiáu por culpa de que nun baxaba’l pantalón con regularidá, fasta que'l día santu pasáu, por nun prender la lluz, garróu del vasal una pila de botón, en cuenta de la pastilla que-y recetara’l mélicu, ya agora va como un reló.

TRABUCAR

(Soleya de Marina Morán, la meyor reportera de la Ponte Castru)

     Tornóu un funcionariu l’ayuntamientu, qu’andaba con floxedá, al hospital colos caberos bandos apeguñaos dientru un tarru ya-y entrugóu l’especialista polo que yera aque!!o. Entós l’enfermu-y retrucóu que yera lu que-y mandara, las disposiciones. El mélicu muertu risa-y aldericóu: non, home, non; yo-y pidí que punxera las deposiciones nun frascu, non las disposiciones.

Vi!!ouril de Sierra

     Un día, hai bien de tiempu, púnxime a tratar de trabucalu a traviés de los carreiros del Partíu Sierra d’au yera’l miou pá. Asina que monté nel vieyu 127 que caltenía d’aque!!a ya colé bien ceo al debalu con esi envís. Nin que dicir tien que nun agüeyé planu nenguno pa nun cayer na cuenta de per onde m’alcontraba. Seique tuvi conduciendo de!!as horas ensin parar fasta qu’al trespasar un pueblu cualesquier acolumbrara pel retrovisor daqué que me !!amara escapao l’atención. Una de las casas trespandaba’l camín per mediu d’una pasera ya aquel requexu me resultaba tremendamente familiar. Pola mor d’e!!o, paré’l coche ya baxé a chisbar; pero nun topé esplicación amodo. Tocante al casu, esclariar que per esa pista yo nun pasara na vida. Escaecí la tema fasta que pasáu un añu, de la que taba cucando unos mapas, decatárame de qu'aque!!a aldea yera Vi!!ouril de Sierra, au naciera un de los güelos, al que nun conocí. Amás, fai dous días, m’apurrienon de Cangas una partía de nacimientu de miou pá, na qu’apecían el nome d’esi güelu ya’l de los sous pas que según asoleyaba’l documentu yeran tamién, ambos dous, d’aquel !!ugar, Vi!!ouril de Sierra. ¿Sabe daquién desplicar lo que m'asocediera entós?, ¿memoria xenética?

Naufraxu

     Tuvi bien de tiempu navegando n’Internet al debalu ya, d’esa miente, sufrí un naufraxu; sicasí, de la que m’arrefundía, salvé la vida porque al empar taba colingáu de la Rede.   

A la gueta'l tíu Benino

     Esti yera l'el tíu Benino, ape!!idábase Rodríguez Suárez. Daquién va dicir pol uniforme que yera de la roxada; pero non, él yera teniente pol valor qu’amosara ya por cayer firíu de!!as vegadas, magar qu’él defendía lu que-y había tocáu defender escontra los que dienon el golpe d’estáu del 36. Cuento que más que roxu fora verde, como L.lugarnes ya’l sou conceyu Sierra onde naciera nesa Asturias tan guapa que nos abluca. Touvía agora, bien seguro que caltién tamién verde los tapinos del terrén del Frente de Llevante onde l’arrefundianon el 20 d’agostu de 1938, con 25 años, pa enxamás volver a saber d’él. Yo, yá busqué’l sou cadabre bien de tiempu, a traviés de Fórum pola Memoria ya de los archivos militares de Salamanca, Valencia, Ávila, Guadalaxara, Madrid ya Segovia, amás d’outros muérganos oficiales; sicasí, las cunetas ya carriles paez que nun guardan un res de memoria, ya los que disparen, seique tampoco. Naque!!a dómina, de la que finara la guerra, yá la mi probe güela, que talamente perdiera outru fíu n’Africa, buscóu acu!!ó pelas fasteras d’aquel frente ensin un plizcu de suerte o de xeitu pa echala un gabitu. Quiciás, yo, de la que tuvi per ei!!í,  pisara ensin querer a la vera la so cadarma. La mi tía María, d'Ounón, que va pa la centena d’años, inda !!ora la súa ausencia. Las guerras las ganan siempres los d’enriba ya las pierden ya carecen los d’abaxo.

Una copa vinu Tierra

     Toupéme con esta soleya de Borja Fernández, au l'eméritu doutor Chumón, que vieno de seipa Dios onde, ya exerce agora como mélicu de parentela per tol occidente d’Asturias, encamienta tomar namás qu’una sola copa vinu ta perclaru que de Cangas  nas comidas. Dempués trabucanon el mensax ya punxenon al día; sicasí, el  mundial doutor Chumón aporfia en que ye una a l’almuerzu, outra a la xanta ya pa finar, ya col procuru de dormir bien esparráu, outra a la cena. Asina que yá lu sabéis. 

Un cuentu

      Ye mui fácil creyer un cuentu, a nun ser que lu espurran demasiao o aporfien en dar esplicaciones.

POUCU SALUDABLE

     " L'aceite d'oliva ye poucu saludable, según Reinu Uníu..."

     Coime, esta xente siempres ta cafiando, pos qu'echen té a la ensalada ya curien de la cagalera.

Norabona a los aficionaos a la espeleoloxía.

     Dos nuevas cuevas van incorporase a la bayura espeleolóxica d’Asturias, al no ser quien nenguna alministración en pone-ys en funcionamientu práuticu pa tresporte ferroviariu. Camudarán el sou nome polos de Furacu de la Parrala I y Furacu de la Parrala II.

El cuentu la esbariante

El cuentu “La esbariante”. Capítulu mil ya milenta.

     Fomentu diz agora qu'hai presupuestu p'abrir la Variante Payares en 2014, sacantes qu’haya "problemas téunicos" (LNE, 2 ochobre 2013).

     Yá en 2004, l'entós ministru de Fomentu, Xicu Álvarez Cascos, al llantar la primer piedra, espetóu: Pa 2010,  el viaxe Uviéu-Madrid se fadrá en 2 horas ya dolce minutos.

     Cuento qu’habrá problemas téunicos o maturranga.

El güeyu de Peruxu

   Como yá adelantara en “Pimpiruladas de Pin”, nun topé los micro relatos nin el xeitu escaecíos; sicasí, nun voi perder tamién el contautu con vós y aporfiaré en espublizar dacuando en vez. Gracias a toos los mios amigos pol sofitu que m’emburrianon...

EL GÜEYU de PERUXU

     Tando Peruxu mexando nun escusáu mui puercu-y ciscóu un gotu a un güeyu. Al outru día'l güeyu encetóu ya en magar que nun yera quien a abrilu enforma, colóu pa Uviéu a consultar a los Vega. De la que-y reconociera l’optalmólogu, Peruxu-y entrugóu: “¿Qué ye que tengo’l güeyu vagu?”. A lu que l’especialista-y retrucóu: “Non home, non, lu que tien ye un güeyu gochu”.

PIEL.LO PER UN TIEMPU

    

    El fechu de desaniciar un archivu con unos 200 micro relatos ya dalgunas posteriores contrariedaes embúrrianme a piesllar per un tiempu los blogues (Pimpiruladas de Pin ya Figos en Courias...), el Facebook ya la páxina de las Vaqueiras... Confío en que ceo m'atope con xeitu pa siguir “colingando” entradas ne!!os ya contautando con vós. Hasta entós, dándovos las gracias, despídome de toos con un fuerte abrazu.

Col mióu corazón en Grau

ya l’alma afitada en Sierra,

del Narcea, al outru llau,

la cadarma arré s’aferra.

Per esta querida faza,

el vinu de tierra bebo,

de mestura, la fogaza,

eiquí nel altu l’Acebo.

Onde s’escaez la murnia,

au t’aconseya’l güelu,

onde naide ta de turnia,

au se vive nel cielu.

Col bon xeitu de preséu,

folixando en Santarvás,

caleyando per Tinéu,

o si pa Navelgas vas.

Seya en ríu, seya en monte,

en prau o na romería,

en Somiedu o en Belmonte,

alitarás d’allegría.

Nesta Asturias tan galana,

na súa zona occidental,

vas refugar la galbana,

dixebrando cualquier mal.

L'alcalde Xicón

     Amigu Iván: Al rodio de lu que me retrucasti sobre los Añales de Surriba qu’espublizara Senén y al respeutive del mióu pariente Xicón, que d’aquella taba d’alcalde, seique por culpa de la súa llabor nesa dómina, empobinaron-y una ufierta millonaria de Madrid col envís de controlar a tola gandaya qu’eiquí s’afitara. Talamente voi contate daqué de la verdadera hestoria del alcalde Xicón qu’hai bien de tiempu que trespasara la raya...

Cuando Xicón fora alcalde

de Surriba y redolada,

naide mancaba de balde,

la paz taba asegurada.

Martiriu del malfechor,

colingábalu nel Visu,

nuna forca en tol altor,

del pescuezu, ensin avisu.

De los lladronos, espantu,

sotripaba-ys gamayazos,

soterraba en campusantu,

ente güérfanos rapazos.

Él yera la llei ya l’orde,

xusticia ya falcatrúa,

bien lu sabíen pel borde

de Pilotuertu a Arganzúa.

Col pasu siempre arrogante,

patrullaba col sou chapu,

al prindar cualquier mangante,

amarrábalu del papu.

Él roblaba la sentencia,

nel sou escanu de la esquina,

a la forca, ensin pendencia,

o a la escombrera la mina.

Foi’l más sonáu policía,

el Charles Bronson Surriba,

naide l’escaez un día.

¡Viva Xicón!: ¡viva, viva!

El foucicu encetáu

     Ensin atender a esplicaciones, Xuanón garróu la nieta ya llevóula a Urxencias del hospital del Cangas porque según él se-y había encetáu’l foucicu.

—Pero home de Dios, si esto ye un “piercing” —y retrucóu’l mélicu.

—Será un pirsin o lu que seya —aldericóu Xuanón—; pero recete-y a la guah.a una pomada o daqué pa que-y desapaeza la malura y el granu fierro.

Los calzonciellos de Nalo

     Asocedióu que la muyer de Nalo viera rebaxaos unos calzonciellos de Mickey Maus nel Tayu Inglés ya arramplóu con tous pal sóu home que taba en casa de más. Seique dous meses dempués, pasara pela súa aldega una comisión de Disney col envís d’escoyer una braña p’asitiar un parque temáticu ya, de la que vieran tantos calzonciellos colingando del tendal espublizando al ratu de la súa compañía, contratanon a Nalo pémeque pa trabayar n’Almisión.

N'Información

     Fino de tornar d’un cientru comercial que ta mui bien averáu a la mi casa ya en magar que viera a una rapaza mui curiosa que punxenon n’Información-y entrugué que si tenía mozu ya de secute retrucóume que nun me lu diba a dicir. D’outra miente, el xefe qu'andaba caciplando per ei!!í seique miróme torcíu. Asina que toi cavilando que pa que coime asitiaran a esa guah.a ehí si nun pue informar; cuento que meyor taría nun departamentu como’l de Vitoria Secret.

L'Emporcáu

     L’Emporcáu ye un rapaz que tien tola pelleya tatuada, al que-y presta zumbar a tou meter col coche. La mala novedá ye que tuviera mui grave por culpa de que topetó contra una furgoneta la selmana pasada camín de Zarréu. La bona novedá foi que la furgoneta yera de los de Pelikán ya punxénon-y una tresfusión al instante.

Más lóxicu

     Cobránonme tala burricada nel recibu la lluz del mes pasáu que fino d’aldericar al presidente la compañía si nun sería mas xustu'l partir con tous los demás usuarios el patrociniu añal de la Lliga Endesa.

El café

El mélicu quitóume’l café por tener el colesterol altu ya, como yá taba pago, chumóulu él.

San Pedru Culiema

     De nenu, siempres sintiera falar al mióu pá de la mesma retafila pueblos: Ordiales, Soucéu, Va!!icie!!u, Brue!!es, La Venta, Vi!!adestre, Ounón, Vi!!auril, Siasu, Courias, La Veiguie!!a, Viescas, San Pedru Culiema... Yera talamente como oyer al maestru los ríos o las capitales d’España. Yera como un cantar a!!ouriáu d’un desaniciu forciáu. D’aquella, contaba toa triba de cuentos d’esa fastera Sierra au los fíos non meirazos tenían qu’abandonar la casa, ensin nenguna clas d’enoxu. Cuando yo yera pequenu, nun había coche en casa ya si había que tornar pa L.lugarnes, como cuando se vendiera la casa (al mayor matánonlu los moros), tenía qu'echar el día ya milenta calamidaes. De magar que volviera, aporfiaba col cantigu: Ordiales, Soucéu, Va!!icie!!u... Güei, inda soi quien a recitar las ciudaes o pueblos más nomaos de tolas provincias, como los deprendí nel colexu; sicasí, nun escaezo tampoco los de los nomes que, de la mesma mena, m’amosara’l mióu pá. Nún d’e!!os, va celebrase la fiesta patronal nos caberos días de xunu. El cartelu espubliza al altu la lleva que contratanon a Anabel Santiago, Dúo Habana, Acebu, Tania y el sóu acordión ya Pamela y Cía. Tous aconceyaos na mesma folixa d’una aldega per ayuri. San Pedru Culiema, un de los pueblos aneciaos pola memoria’l mióu pá, va arreventar d’allegría nesta dómina de crisis ya d’amarguriu. Que-ys dean al Bancu Cientral, al Fondu Monetariu ya la Comisión Europea. 

Pambléi

(L.lugarnes)

     Tuvi una nueite charrando con una moza de Pambléi nel Carmen de Cangas. Teo una prima carnal que casara con un de Pambléi. Tuvi nel chigre Pambléi almirando las súas barricas ya chumando un vinu Tierra. Tuvi nuna tenyera Pambléi agüeyando L.lugarnes, el pueblu’l mióu pá. Güei, de magar que pasaran más de trenta años, escaecí la moza; la prima, separtóuse; las barricas seique yá nun tan ya nin siquiera acolumbro L.lugarnes, nin dende Pambléi, nin dende aquende.

Las vaqueiras ya la tonada asturiana, Patrimoniu de la Universalidá

     Van oyenos glayar. Tamos fartos de tantu escaezu. La nuesa música, el nuesu folclor, las nuesas costumes qu’enxamás se sintieran pela radio nin se cucaran na televisión carpetuvetónicas yá nun van ser enxamás refugaos. L’UNESCO pué declarar “Patrimoniu de la Humanidá” a lu que-y pete, como fixenon colos fados, los mariachis o'l flamencu. Nós vamos dar un pasu más alantre porque nos plaz ya porque, amás de ser mundiales, somos universales, declarando “PATRIMONIU de la UNIVERSALIDÁ” a los sones ya vezos d’Asturias.

     Xúnite a esta xera, como ta faciendo una montonera xente, en...

     http://www.facebook.com/Cantaresasturianosuniversales?fref=ts

Pol golor

     A Masimín, la súa muyer, Prudencia, mandó-y a la botica pa que-y dieran daqué pa los pies, pos tarrecía dir a un casoriu que tenían en Cangas, yá que pasara muitu noxu nel caberu del sobrín de la que-ys dexanon solos na mesa. Mal a gustu, Masimín, como ye abondo bisarueñu, nun-y entrugóu nada a la farmacéutica ya mercóu unas tiritas nasales qu’eillí mesmo apegóu nos sóus calcaños pa que-y alendaran los pies. Lo peor del casu foi qu'a la boticaria, qu’andaba mui abultada, adelantóse-y la nacencia por mor d’esa ocurrencia ya tuvo que llevaila a l’hospital ya piesllar el mesmo la farmacia.

Na piscina d'iviernu

     Si quies pasar abondo bien una ratada, has dir a una piscina d’iviernu. La piscina d’iviernu ye como la de branu, pero con teitu. Agora que, nun escaezas mercar un gorru gaiteru gallegu de plásticu pa nun espelurciar ya porque si non, nun van dexate somorguiar. Tamién una lente cola contorna de la mesma clas pa que nun t’arrefundan agua nos güeyos. Nun aportes los preseos de la pesca yá que nun tan autorizaos ya amás pues espetar dalguna ñocla. Tampoco rías del que fai esparabanes pela oriella porque de xuru enfocica. De secute, tienes que siguir al que nala per delantre na canal fasta qu’afuegues de dar forcadie!!as. Curia que nun te cisque dalgún gochu que siempres surnia’l mocu ya del chiflu l'encargáu por si te riñe. Nun tarrezas calzar las chanclas al surtir pa nun agafar los pies col pisu. Dúchate dafeitu pa quitar el cloru, el mexu ya la mormera ya, depués de vistite, colinga la percha nel gabitu onde la garraras. A la fin, cola pa casa a cuntar que ficisti un cientu !!argos, anque nun algamaras nin siquiera los venti, ensin españar de risa.

Un bon cuentista

    Cavilgo qu’en toa estaya nun hai nada como tar abondo bien consideráu. Sobre too si ye la mesma parentela la que xulga valoratible la túa xera !!iteraria. Al respeutive, yo afáyome enforma na mía casa, yá que siempres la muyer me camentara que toi feitu un bon cuentista.

Catar

     Los asturianos somos los que más fuéramos a catar ya enxamás camentóse nada. Agora que va dir Urdangarín, ármase la de Dios. Tamos perdiendo l’aldu.

CALOR

     Eiqui en Madrid, como nun va ún a finar pasáu como una maniega. La xente ta a!!oriada perdía, nun sabe lu que quier; tol iviernu ya un bon cachu primavera reburdiando por culpa de que nun salía'l sol ya, agora que sal, pónense a la solombra pola calor.

Tous virolos

Queríu Xuacu:

                       Yá veo pola vuesa que las vacas ya vos siguís ensin novedá, de lo que m’a!!egro enforma. Per eiquí nun nos podemos quexar, sicasí en Madrid ta poniéndose la cosa mui fea; por esti motivu, agüeyas muita xente cuitada que caleya falando sola con cables colingando de las oreyas ya con fierros espetaos nas napias que paez que-ys pinga’l mocu. Outros, nel metro, van calcando a tóu meter los móviles o cucando pa un marcu tol trayeutu ya finan seique virolos. Yo, yá fai tiempu que !!evo’l de la tía Asuncia, la que marchara pala Arxentina, ya miro pa él, pa nun !!amar l’atención. D’outra mena, retrucate que, col preciu que paguen el !!eite, nun paga la pena catalu.

                          Bono, per esta namás, da-ys alcordanzas a los de la partida, el mi enfotu ye veros a tous pel branu, de la que m’avere nel Alsa. Un melosu abrazu d’ésti que vos quier.

                                                                                                                      Pindesierra

INDULTU

     La Cofradería del Santu Cristu del Perdón de Llión indulta güei, Martes Santu, a un presu ya va ser l'Abá, xunto al pórticu de la Catedral, quien proclame ante la imaxe del Cristu del Perdón y ante'l pueblu lleonés la solicitú de perdón a favor del penáu pal que pidióse l'indultu... (26.3.2013)

     Eso nun ye nada, ehí ye namás qu’en Pascua. Eiquí en Madrid, los xueces o las lleis cuento que son muitu más piadosos ya nun hai que sacar de prisión a naide que faiga una fechoría por culpa de que nin siquiera entra. La cuestión yá s’espardiera per tol mundiu  ya, en resultas, nun hai quien salga a la cai.

PARTÍU SIERRA

Pa cantar ya pegar palos,

viva’l Partíu de Sierra,

seya nos chanos más ralos,

o per au la pega berra.

Dempués del Papa ya’l Rei,

amuesan los pretoglifos,

ye la casa de Pambléi,

qu’en escudu tien gorrifos.

Emburrianon los becerros,

xatos, nestos andurbiales,

los vecinos d’estos cerros,

andechando en Becerrales.

Pola estampida, nel cabu,

foi ganada la batalla,

asina nacéu Valcabu,

afincada nesa raya.

Morrienon tantos nel foru,

que queimanon las cadarmas

nel mesmu L.lamas del Mouru,

tras pasalos polas armas.

Pa cacharros ta la Venta,

ya pa bravas, las xarreiras,

el dineru de la cuenta,

guárdenlu nas faltriqueiras.

Pa mayar tan los serranos,

amañosos col cayáu,

los cangueses más ufanos
ya qu’afayen nel fregáu.

El Caleru

     El Caleru ye un tipu mui duru de la parroquia Carbachu que-y chamen asina, agora que muitos paisanos yá s’echen desodorante, por culpa de qu’él espolvoria de!!a cal nos sóus sobacos cola cuenta de-yos desagafa dafeitu. 

Angelina Jolie

     Angelina Jolie nun fai más qu’aporfiar en escribime, magar que yo enxamás-y retruqué nada. Sicasí, nun sé lo qu’andará amañando esta muyer, pero cuento que'l sóu home tien que lu pasar mui mal a la súa vera, por culpa de que namái que colos sos correos lleutrónicos ye quien a encetame tolos archivos del mióu ordenador.

El Meticón

     Tengo un  vecín mui meticón que siempres quier enterase de tou lu que pasa pela redolada ya esta mañana, mui ceo, topéme con él de la que tornaba pa casa. De secute m’entrugó que si tuviera pela nuoite con dalguna moza. A lo que-y retruqué que sí, que con dúas enfermeras ya una mélicu. Aina, m’aldericó ablucáu: ¿Tu solu? Entós-y espeté: non ho, con un cólicu nefríticu.

San Antón

Un día de San Martín

mataron a la Cordera,

que foi la vaca Pinín,

perbaxo d’una panera.

Asina contóu Clarín,

un día de primavera,

morréu la vaca Pinin,

que-y llamaban Cordera.

Que-ys valga San Antón

a las vacas ya gorinos,

que l’outru nun pinta bon,

por culpa los samartinos.

Las muyeres daquella

     N’outra dómina, cuando Franco, taba mui mal visto tar arrexuntaos; de la mesma mena que taban mui mal vistos los tatuaxes. Por esti motivu, tol mundiu murmuriaba de los que se caltenían asina ya, pelas cais, caleyaban separtaos. Entós, yo de guah.e cuntaba que la planta de complementos de muyer del Tayu Inglés furrulaba pa qu’atoparan mozu pal cosoriu las muyeres que nun yeran quien a alcontralu ellas mesmas. Tamién cavilgaba que si desta miente tampoco empareyaban, de secute, tenían que xubir a la planta d’oportunidaes. Lu que nun sabía daquella yera a que pisu debían dir las que quedaban pa vistir santos.