Morriera Sevilla.

     Dexónos Sevilla con 91 años. Una gran perda pal conceyu de Grau. Xosé Lluis Barna tuviera tola vida venceyáu a la casa conceyu y a la propia biblioteca de la villa ya abúltaseme que nun habrá naide nella que nun lu conociera. Sentí dellas anéudotas que−y asocedieron colos guah.es nesas dependencias y que Sevilla siempres supo componer con bon xeitu. Coincidí bien de veces con él nel Exprés, onde díbemos a almorzar. Él cubría crucigramas mentanto yo lleía la prensa o encoplaba dalgún poema n’otra mesa a la so vera. Tamién charrábemos y ríamos; sicasí, recuerdo con gran emoción cuando colos sos güeyos llenos de llárimas me comentó que morriera la so muyer. Sí, Sevilla, cubrió Grau de sorrisas, pasatiempos y bonas alcordanzas. Hai yá más d’un añu que Nando Fernández asoleyaba esta melguera biografía del fináu nas páxinas de La voz del Trubia que güei recupera y que yo comparto na so memoria. ¡Fuelga en paz, amigu!

¡Salú!

     Como siempres, nesti día, deseavos muita/muncha salú a toos. Nun esmolezáis porque −como a la mi muyer− nun vos tocara nada nel sortéu de Navidá yá que vais poder siguir tirando los cuartos nel de Reis. Encamentar que la llotería nacionaliega, las quinielas, la primitiva, el bonolotu, euromillones y toa esta triba d’apuestas al ser del Estáu nun provocan nenguna clas de vezu nin de viciu.

Guapia'l Narcea

Güel la moza a lavanda,

el mozu a espliegu,

si tras la moza anda

como’l rapiegu.

El cebollu Pousada

nunca güel mal

con lavanda semada

nel pebidal.

Nun esqueiza la xente

esti pueblín,

porque produz inxente

el cebollín.

Nun naciera en Pousada

nenguna fea.

Cola ponte pasada,

guapia’l Narcea.

Son Santianes ya Tuña

el mesmu edén,

onde desenfurruña

quien eiquí vien.

Alhucema o cantuesu,

l’arume abarca,

arrodia’l banzáu nuesu,

el de la Barca.

En Merillés ya Tueres,

baxo la fana,

hai mui guapas muyeres,

flor d’hortolana.

El desodorante

     A Xabelón, que marchóu pa Uviéu nel coche llinia pa visitar a un pariente, se−y asentóu a la vera la muyer más flera de la parroquia. Foi'l casu que nel intre−y entrugóu por si enantes tuviera cebando los gochos na cubil. Xabelón, que ta mui preparáu, decatárase aína de la mala zuna de la pregunta ya pidiera nun comerciu de la capital el torga golores más fuerte que tuvieran. La verdá ye que foi un aciertu yá qu'agora, qu’esparde’l Zotal puru pelos sobacos, nin se−y arima la más meticona nin nenguna outra.

Aneciando col envís

Torra, aneciando col mesmu cuentu, apurre a Falconetti un CD −ensin R− aporfiando col son nel sou propiu envís…

Sangre, sudu ya llárimas

Je vais

tu vas

Il va…

     ¿Aú veis ho? Eso me viniera al maxín de la qu’entré por primera vez naquella clas d’aquel nuevu colexu ya vi un numberosu garapiellu rapazos recitando’l verbu “aller” na vera la cayuela. Finaba d’aprobar nel añu 60 del pasáu sieglu l’exame d’ingresu con nota ya los mios pas matriculánonme en Leymar n’abandonando la outra escuela de Don Fidel. Agora tocaba deprender dalgunas asignaturas nuevas, ente ellas la de francés. Entamé con un llibru Perrier hermanu del la semeya, qu’anguano atopara nun requexu escuru (como’l del arpa), magar qu’aínda más vieyu ya venceyáu al primer grau, yá que’l de la foto yera de terceru ya remaneciera dempués como una verdadera novedá. Nesos primeros días m’afayaba contentu ya dispuestu a esqueicer los gamayazos del anterior maestru. ¡Ai de min, probe!, como diba a cuntar qu’eillí tamién amenaban ya eso qu’a un de los docentes−y acristiananon d’Amador. A nós, nos sotripaban por defeutu, cuando nun sabías la lleición ya n’Asturias por escesu, de la qu’aportabas dalguna pallabra de la llingua’l país que s’afanaban en desaniciar pa gayola de los repunantes actuales. Ye’l casu que naquella dómina garrabas conocimientos, o los perdías, a fuerza de sangre, sudu ya llárimas.

Baselgas

¡Qué guapa que ye Baselgas!,

de la que xubes, ablucas,

de la que baxas, ximielgas,

de la que la ves, atucas.

Onde ye verde la coria

ya l’agua’l sou mesmu sangre,

eillí tol que llega amoria,

apeguñáu nel sou mangre.

Na ruta del Conde Cualla,

ente viesca pura ayalga:

castañal, carbayu, faya,

cuerren pel monte la galga.

Mui bien cerca de Las Murias

ya tamién de Santu Adrianu,

la natura echa las gurrias

mientras la collecha’l granu.

Onde Antón ordena y manda

nun castiellu de raigañu,

onde remanez la escanda

ya’l sou molín nel secañu.

Del Cébranu ye la santa,

folixa al rodiu la ermita,

el que na fiesta nun canta

ye porque glaya a la grita.

Onde dixenon: ¡Volvéi!,

el garapiellu vecinos,

au t’afayes como un rei,

au te llevan los caminos.

Vivir ensin ciñu

     Tol mundiu sabe que Rufina ía la gata de la vecina. Lo que nun sabe la xente ía qu'a Rufina nun la reconoz nin la madre que la echó. Por culpa d'ello, el fíu d’esa muyer diz qu'esa muxina nun ía de sou. La súa ma, que tampoco ya que si dacuando en vez−y echa daqué d’esperdicios ía porque−y da pena. Amás, Welcome −que la pariera− tamién la refuga ya de la que se-y avera-y endilga  direutos de manzorga−drecha. Sicasí, Rufina ía ciñu puru ya de cutiu !!ambe’l foucicu de la potencial parricida. El probe animal s’alcuerda abondo bien d’aquel repunante día nel que la pillara un coche ya nun sal enxamás a la cai; poro, cuando tamos pela faza se caltién siempre al nuesu llau col envís de ser quien a llenar el banduyu ya sentir dalgún afalagu mentanto torga’l peligru. Darréu, namái colamos, l’animal apingaya a la par del perru de cerámica que, magar nun−y dea afeutu nin proteición, pelo menos nun−y sotripa la caxada.

Pousada

Güel la moza a lavanda,

el mozu a espliegu,

si tras la moza anda

como’l rapiegu.

El cebollu Pousada

nunca güel mal

con lavanda semada

nel pebidal.

Nun esqueiza la xente

esti pueblín

porque produz inxente

el cebollín.

Nun naciera en Pousada

nenguna fea.

Cola ponte pasada,

guapia’l Narcea.

Son Santianes ya Tuña

el mesmu edén

onde desenfurruña

quien eiquí vien.

Vergoña

       Mientras qu’unos ya outros retrasan tolos años el ramu las obras de la Variante Payares, en Grau hai una montonera tiempu que yá ta furrulando una carril pullu. En resultancia, a los de l’alministración xenral seique−ys debería dar vergoña a esgaya.

Si tu foras la muyer

Quixera yo cuntate tolos cuentos que cuntara nesta vida,

pa qu’ansí seyas a rite cada día más,

de la que teamos xuntos allá en cuetu una pruída

ya colos mious encoples llenes un cabás.

Si tu foras la muyer

d’un calavera,

lu emburriara yo a cayer

na talambera.

Si foras la súa muyer

ya lu quixeras,

que diga al atapecer

cosas melgueras.

Quixera regalate bien de suaños que soñé mientras dormía,

pa que con tantu suañu puedas esnalar.

Que pienses qu'ía’l suañu la verdá de cada día

ya seyas tan feliz que nun te pruya espertar.

Si foras una muyer

feita tremera

queriéndolu caltener

a la túa vera.

Si  foras esa muyer

ya tu quixeras,

lu tendrás que convencer

que nun quies lleras.

Asina la súa muyer,

por compañera,

con él vas remanecer

siempre a la vera.

La Puela

(Allande.es)

La Puela siempre foi guapa,

siempre foi guapa La Puela,

arrequexada nel mapa,

esneldando l’acuarela.

L’ayalga del Occidente,

col palaciu de Cienfuegos

escuclando a la súa xente,

las ferias, fiestas ya xuegos.

Col Ablanu o Avellanu

de folixa principal,

la villa asitiada en llanu

ya un conceyu ensin igual.

Onde’l silenciu afalaga

ya comparte bona mesa

col ríu Nisón que vaga

pel Lozano ya Allandesa.

Colas casonas indianas

esguilando a la capiya,

colas súas mozas galanas

tan guapas como la villa.

Col sou parque del Toural,

ilesia y casa conceyu,

la Descarga ensin igual

te va cortar el resuellu.

Nesi Camín Primitivu

que t’averará a Santiago,

si nun te quedes cativu

ya’l marchar te da empalagu.

Anque a dalgunu–y duela,

güei se tien yá qu’enterar:

haber, sólo hai una Puela,

onde yo fui a cortexar.

N'avanzadura

(Camión ensin conductor. Foto, LNE)

       Amás de volver a ser escoyida en 2019 como la ciudá más curiosa d’España, según la OCU, Uviéu tamién ía agora la primer ciudá d’Europa en disponer de camiones de la basura dafeitu autónomos, de los que naide conduz. ¡Norabona a tolos carbayones por ser a afitase n’avanzadura del tratamientu de residuos!

L'estrañu asilu

     Aquel asilu de vieyos s’asitiaba nun claru una viesca per onde nun pasaba nin sol nin tiempu. Por culpa d’ello, morríen enantes los cuidadores que los internos. Un día que caminé al debalu pudi escuclar per detrás d’un carbayu una chocante folixa dientro. Colé colas ganas de tirar una fouto, yá que nun acarretaba la cámara. El xueves pasáu, dempués de cuasi vente años, garré la mesma sienda cola idea d’averame de nuevu a aquella residencia, pero nun fui quien a atoupala.

La pasarela del Metro (toca en castellán)

Ese Metro de Madrid

sirve hoy de pasarela,

desfila el más infeliz,

el creído y la más lela.

Con Ghlain Klain, el hortera,

con un cierto disimulo,

se deja la raja afuera

y nos va enseñando el culo.

Por lucir su calzoncillo,

se muestra cual esperpento,

lo compró en un baratillo,

mas presume tan contento.

Satisfecho del señuelo

y sin que apenas se note,

se lo brinda con gran celo

a la del abierto escote.

Que también airea el tanga

–de ropa interior el reto–

que aunque sea una pendanga

merece todo respeto.

Esta práctica foránea,

por costumbre hay que aceptarla,

en la línea subterránea

o en el tranvía de Parla.

Tradiciones que enriquecen,

dice el progre que progresa,

él sabrá lo que nos cuecen,

que nos sirven por sorpresa.

Con su gorra de macarra,

con la visera al revés,

este poema te narra

como culea el que ves.

Pa lu qu’hai qu’oyer

(Semeya d'Earphones)

      Abúltaseme que na Rede saben cuasi tou de ti, yá que nun sé quien coime–ys chivara a los d’una casa d’audífonos que toi perdiendo audición del oyíu esquierdu. El casu ía que güei m’ufiertan: “Una calidá de soníu escelente ya col 50% de rebaxa por llanzamientu”. Lo meyor de tou ía qu’amiestan l’imaxe d’esta mocina tan curiosa, que nun sé que tien que ver o oyer na súa ufierta. Sicasí, me gustaría que supieran que nun toi interesáu, por culpa de qu’aínda hai cousas de las que nun paga la pena enterase.

L'ALSA de Granada

     

     Daque!!a, l’ALSA nun circulaba más que dúas veces per selmana pela carretera La Puela. Anguano algamen cualesquier destín per tolas vías d’España; ta perclaru qu’incluyíu’l de Granada. Foi’l casu que, !!ueu d’una montonera d’años, garramos el que diba pa esa capital col envís de ver al miou hermanu. Agora, con tantos adelantos, el conductor yera quien a prender el motor dende una botonera ya cuasi que nun runfaba. Amás, cada asientu tenía un ventanu eleutrónicu nel que podías esfrutar de la prensa, de música, de xuegos ya de bien de películas. Toos menos el de miou que nun furrulaba, colo que quedóume pruyendo’l sangre por e!!o. Güei vienres, de la que tornamos, atolené col mesmo coche ya ¡la mesma butaca! Nin que dicir tien que l’aparatu siguía ensin iguar, nun funcionando nin siquiera l’aplicación Buspad, que nun sé nin pa que coime sirvía. Asina que colé de la vera la muyer ya trespasé al outru !!au, onde nun había naide, un instante enantes de que–y cayera’l móvil a una china d’un bolsu qu’a!!ugóu xustu perriba de la mi cabeza. En resultancia, festexé la bona suerte de torgar el sou impautu ya escoyoné tantu cola comedia que vi darréu como los que me decatara dempués que taben mirando pa min, yá que por culpa los auriculares nun reparaba de que taba riendo al altu la !!eva.

Xanta de respetu animal

     Ente los frixuelos que faes tu, hermanina, ya los espárragos que rustio yo –ensin amestar las gomas–  díbamos preparar una bona xanta de RESPETU ANIMAL, magar que con abondo fundamentu.

PER SAN ANTÓN, LO BONABLE PON

(Semeya de Consuelu Rodríguez)

Zara ya Logan,

Logan ya Zara,

nun ye un eslogan

que’l xeitu encara.

Tan nuna corte

en Vi!!aoril,

na rasa norte,

xunto a un petril.

Logan entruga

a la becerra,

pela relluga,

qu’asoma en Sierra.

¿Quién ye esti nuevu?,

ye’l miou xatín,

¡Virxe l’Acebu!,

¿me quedrá a min?

A ti te quier

ya a min tamién,

esa muyer

sábelu bien.

Que nos da asuelu

como manteiga,

l’ama Consuelu

de casa Veiga.

Nel estru s’echan,

nengún lladríu,

quiciás andechan,

col so llambíu.

Distinta especie

en convivencia,

tol que lu aprecie

tome conciencia.

D’exemplu val,

ensin remor,

mundiu animal,

bonaz ya amor.

La orquestina

Chegóu a casa’l Xiblateru,

mercáralu la muyer,

costó–y abondo dineru,

pero, ¿qué–y vas facer?

Dempués vieno un violinista,

qu’acarreta un vigulín,

hermanos a simple vista,

seique hermanos a la fin.

Magar que son de madera,

se m’abultan de verdá,

hai de nueite escandalera

ya conciertu en Navidá.

De la que voi pala sala,

ellos dexan de tocar,

pueque finaran la gala

o quieran disimular.

Darréu miro–ys a los güeyos

la súa mirada perdida,

sobro embarnizaos papiellos,

paecen nun tener vida.

Como nun amuesan biecu

nin echan los imposibles,

escapao torno al trubiecu

ya los mios suaños pacibles.

Por culpa d’esi xiblante,

que se siente tras la muria,

amás d'al acompañante,

a la d’al llau entró–y furia.

Denunciara esa vecina,

anque a los municipales,

sin pruebas de la orquestina,

nun pagué nin dous reales.