TIEN QUE LU AVISAR

FELIPE VI: El Palaciu Real ía de tolos españoles…

PINDESIERRA: Gracias, Maxestá; pero tien que lu avisar enanties al de la puerta, que me torgaba d’entrar si nun-y pagaba la entrada.

Na escalada

 

De la escalada,

baxan tres nenos,

cara tisnada,

de xuegos, llenos.

 

Un par son roxos

ya l’outru prietu,

ensin anoxos,

tiran del tetu

 

de la folixa,

del tobogán,

cola sorrisa,

dos baxarán.

 

L’outru ta murniu,

enfocicáu,

anda de turniu,

mira pa un llau.

 

Calada boina,

vistíu blancu,

nun queda toina,

carreña o zancu.

 

Hai unos años

que fonon güelos,

aque!!os ñaños,

güei yá son duelos.

 

So ta’l !!eñeiru,

enriba’l cielu,

d’aquel xineiru,

nin resta un xuelu.

 

Yá nun esiste,

esa reciella,

sólo esta triste

guapa semeya.

 

El tiempu engaña,

ía falcatrúa,

las vidas paña:

túa, miou, súa.



¡Nun más violencia!

     Qué naide fraye nunca la túa felicidá, la túa llibertá, las túas ganas de vivir, de lluchar. LA TÚA VIDA... ¡Non más violencia! (Lucy Armesto López)

 

Salta la vida, miou nena,

blinca per enriba d’ella

anque tea d’amores llena,

peneira la túa pareya.

 

Que la vida nun ía comba,

qu’esguilarás más davezu,

cuando nun hai fana, hai llomba,

ía cenciellu’l tropiezu.

 

Enantes que seya tarde,

escueye cola razón,

qu’agora la cousa arde,

amodo de maldición.

 

Si sal l’home travesáu,

nun aguantes por medrana,

refúgalu del tou llau

ya meyor güei que mañana.

 

Nun consientas violencia,

magar teas namorada,

la tema de la querencia

ía tema tolerada.

 

Tolerada y tolerante,

nun almite discutiniu,

nin ablugues al mangante,

nin al faltu raciociniu.

 

Nin una sola flisguada

tienes tu que carecer,

tras la tuenda denunciada,

nun tornes con él, muyer.

 

 



L'hotel del mélicu

     Pelos Santos, tuviera unos días en Benidorm por prescripción facultativa, yá que’l miou mélicu tien un hotel na sablera’l Poniente ya nos empobina a eillí a tolos frayaos. Diera la casualidá de que me topé con un paisanu d’un pueblu que t’asitiáu na xubida L.leitariegos, del que nun recuerdo’l nome. Foi’l casu que davezu acutaba una sombriella na piscina cubierta ya por culpa d’ello-y entrugué que por qué coime lu facía,  darréu retrucóume que por manda-y algo yá que finaba de mercala. Sicasí, la ocurrencia más gorda foi cuando baxara unos calamares de la xanta al  jacuzzi col envís de que rustiaran un rispiu más. Ía lu malu que tien nun ser veceru del mélicu del hotel, que nun anda ún controláu.

La tableta Benxamín

 



Ía alcordanza ya añada,

esta ayalga Benxamín,

con memoria incorporada,

magar seya un pizarrín.

 

L’amuesa’l nueso collacio,

qu’a naide-y entre la risa,

qu’anque paeza despacio,

pasa’l tiempo mui apriesa.

 

Yo tamién tuviera una,

mas nun tuvi’l sou procuro,

nin la súa bona zuna

de guardala pal futuro.

 

Güei que l’alvertí a la gueta,

de tanto artefauto, farto,

m’abluca la súa tableta

ya con toos la comparto.

El razcayeiru

Nos cuentos, la princesa siempres ye abondo guapa; sicasí, el mozu nun suel ser un razcayeiru que foucica en platu pa xantar ya que ye quien a tocar la gaita. De tala miente, los perros nun tan avezaos a falar. Eiquí vos colingo un, magar que nun vais ser a finar de velu sinón lu facéis con güeyos de nenu…

Aplicaos

     Hai xente na Parroquia l’Aire que nun sabe que’l sou pueblu llámase San Fliz. Hai xente de la Parroquia l’Aire que nun conoz que la parroquia que t’asitiada a la vera se llama San Fabondu. Hai bien de xente per toa Asturias que nun sabe cómo se llama de verdá’l sou pueblu nin la súa parroquia nin como falaba’l sou güelu na súa llingua, nin-y importa un res. Sicasí, esta xente tan desapegada presume d’asturiana ya-y  presta’l xubir a l’árbol, garrar la flor y apurrísela a la morena de la copla. N’Asturias hai una montonera xente a la que nun interesa nin el raigañu nin la súa historia porque nun producen nada. Sí, n’Asturias hai bien de xente aplicada; desarraigonada, pero mui aplicada. 

Nel ximnasiu

(Semeya: ectomorfo-delgado)

Apuntárase’l miou fíu al ximnasiu qu’asitianon a la escontra casa ya, por culpa de que pagara un llibramientu familiar, m’anduviera emburriando a averame a él, yá que taba ensembre pago. Magar que toi feitu un farrapu, güei aporté eillí ya seique aguantara restolando nos sous preseos más d’una hora. De resultes, anque torné un migayu amoriáu y a poucu valto al surtir, bien seguru que finé abondo más fuerte; asina que, si hai dalgún faltosu o cualquier panoyu foucicando per equí, que s’ande pelo segao.

ÚLTIMA HORA

PRINDANON AL RESPONSABLE CABERU DE LA PÚNICA

Según fontes averadas al Beberciu, nuna operación conxunta de tolas fuerzas d’orde, prindanon a un norafricanu na ciudá de Saguntu como responsable caberu de la Púnica. Al paecer vivía nuna escomunal finca en compañía del so xenru arrodiaos d’una desaxerada montonera elefantes que caltenían ensin nenguna clas de permisu.

Queima Armayán

(Semeya, LNE)

     El nuevu focu del monte Armayán (ya esto nun son bardayos) s’amiesta a los 14 fueos que tán activos nel Suroccidente, nos conceyos de ¡Tinéu, Cangas y Allande!, nos que'l Principáu caltién activu'l Plan de Quemas Forestales del Principáu d'Asturias (INFOPA), en situación cero, esto ía, de “siguimientu”.

     Pos, siguimos: cuantas casualidaes aportan de casualidá por casualidá…

Queima Surriba

     Arde outra vez la redolada Surriba en Tinéu ya tornará a amburar de la que cuadre. Dalgo falla cuando la política escontra queimas nun furrula. Nun pue ser qu’haiga más xente col envís de queimar que paisanos col procuru d’apagar. Nun pue ser qu’haiga más pirómanos y aventaos qu’aldeanos con un plizcu de xacíu. L’Alministración tien qu’aconceyar cola xente’l campu pa sentir lu que-y esmolez. Hai qu’alcontrar soluciones y facilitar terrén ermu pa chiscar el bardayu y outras pa que nun se prenda por culpa dellos intereses somorguiaos. Hai qu’apautar pa que nun queime la nuesa bayurosa viesca ya per ende la fauna qu’acorica. Agora, a poucu arroxen los muertos nel campusantu Surriba ya cualesquier día pue morrer dalgún vivu ensin posibilidá de torna atrás. Nun quixera escaecer qu’hai unos años tuviera yo namái apagando’l fueu nesta mesma faza, mentanto una cuadriella profesionales aguantóu agüeyándome alredor de 10 minutos enantes d’intervenir. Güei, un númberu de Proteición Civil riñera con un llabrador pa que-y aportara la súa pala goma cola que torgaba que’l llume nun algamara los sous rollos de silu. ¡Tamos preparaos!

Rigu Esva

Rigu Esva, rigu Ese,

agua y sangre de Tinéu,

del Bárcena y Grande’l cese,

onde’l sou cruz ya l’apéu.

"Anque yo sou de la vera,

del occidente’l conceyu,

andecho na mesma xera,

magar que vou siendo vieyu.

Duelme’l ver qu’a la Tierrina

la tornan gafa ya rala,

ensuchan súa verde clina

ya desanician la fala.

¡Dómina de nuesos güelos,

d’un pasáu non mui llonxanu,

falaban baxo estos cielos

toos dafeitu asturianu!

Güei, que colara a la Corte,

vos entrugo día a día:

¿Aú ta la brenga del norte?,

¿la d’estas Asturias mías?

Pente yérbadu ya umeru,

pente’l Cantón ya l’Arena

refundiemos, compañeru,

la túa agua y la mi pena”.

Asina respondéu’l ríu,

con un quexume bien fondo:

esparde’l común sentíu,

que yo yá esbariara abondo.

Esmolecíu

(Recuperación difusa)

      Tenéis que me perdonar si m’alcontráis abondo esmolecíu, ye por aciu de que tuvi ayeri na doctora ya, d’entamo, pasara hora y media reconociéndome por culpa de que yá nun s’alcordaba de min. Foi’l casu que marchanon tolos demás veceros que citaran darréu, esceuto ún que lu ingresanon con ansiedá. Yá, a lo cabero, cubrióu aína un volante ya espetóume: —Pin esto yá nun tien igua pos veo mui difusa la recuperación. Voi mandate al especialista’l PIVE, por mor de qu’andes mui mal de chapla ya de que la mayor parte de las túas coradas furrulan damecío, pa que t’asitie en llista d’espera pa una urxente reencarnación hospitalaria. 

El gondoleru

     Fina d’espetame un vecín na escalera, y ensin venir a cuentu, que marcha cola muyer dolce días a Venecia. Darréu-y retruqué que lu sentía y que nun esmoleciera por culpa la humedá, el mal fedor de las canales y de qu’amorie la fema al saliar nas góndolas que’l tiempu pasa volao y aína van tar de vuelta.

CORRÍU DE CANGAS

(Los Cadavales, semeya de Ridera)

Voz de la tonada mía,

 al espertar la mañana,

quier cantar la súa allegría,

 a la mi tierra asturiana.

Yo-ys canto a los sos montes,

los sos praos, valles ya flores

a viescas, ríos ya fontes,

de Cangas de mios amores.

Conceyu verde y queríu,

si muerro llonxe de ti,

que digan que toi dormíu

ya que me traigan eiquí.

Que digan que toi dormíu

ya que me traigan eiquí,

conceyu verde y queríu,

si muerro llonxe de ti.

Que me sotierren en Sierra,

perbaxo Los Cadavales,

y me cubran d’esta tierra,

trubiecu d'homes cabales.

Son de la tonada mía,

nel riscar de la mañana,

 quier cantar la súa allegría,

a la mi tierra asturiana.

Conceyu verde y queríu,

si muerro llonxe de ti,

que digan que toi dormíu

ya que me traigan eiquí.

Que digan que toi dormíu

ya que me traigan eiquí,

conceyu verde y queríu,

si muerro llonxe de ti.

¡Esconxurái!

    Yá afueguen o maten fasta a los duendos. Vamos morrer toos encetaos o d’un tiru pela viesca. El que sepa dalgún esconxuru qu’esconxure.

Arde Valledor

                                                                      (Queima 2011)

El fueu abrasador ya provocáu,

ya llapada qu'afara l'occidente,

medrana que s'afita en tanta xente,

desastre cada branu soportáu.

Xamusquen Valledor ya'l so vedáu,

aguanta'l llabrador siempre prudente:

mal vezu de dalgún llocu inclemente

qu'en áscuaras camuda’l Principáu.

Queimen casa ya escuela en San Martín,

arruina l'etnográficu muséu,

la llama s’acolumbra en Coucellín,

en Cangas, en Miranda ya en Tinéu.

Castiguen al culpable pol so enclín,

 que muerre la mi alma en Berducéu.

¡PAÑÓME LAS ZREIZAS!

     Un golfón como ésti me papóu tolas zreizas d’una zreizal, magar que tuviera cubierta con una rede ya seique nun me van indemnizar. Amás, sé onde vive de baldre. Anda de caseiru pel miou terrén. Sicasí, anque yo soi del rebañu fatos a los que frin a impuestos, que naide esmoleza que nun-y voi aventar del nieru por culpa de que respeto muitu a los animales. De tala miente, nun ya precisu qu’aporten los “antideshaucios”; pero, como’l mierlu viniera de fuera, ando con mieu de qu'arriendes-y tenga qu’apurrir una paga.

Ensin futuru

                                                                (Semeya, APV)

     “L'asturianu Fernando Alonso dirixe'l primer vuelu de prueba del Airbus tras l'accidente. Esnaló ensin incidencias una hora ya 50 minutos” (na prensa de güei).

     Yá se m’abultaba a min qu’en McLaren nun tenía futuru.

Xorra

     ¡Miánicas!, hai días que paez que llevanta ún del xergón con xorra. M’anduviera mancándo una muela de la filera d’embaxo ya m’averé a una clínica dental al envís de que me la sacaran. Foi’l casu que taba mui agarrada ya, de la que tiróu’l dentista con muita fuercia, nun sólo me llevóu esa pieza sinón outras tres más de las d’enriba. Pos, ¿vais creyer que nun me cobróu nada?

(Si daquién de los amigos del Feisbuc o siguidores de los mios blogues precisa’l sou teléfanu, nun tien más que lu pidir que se lu apurro darréu).

Bochas

Diz la muyer que nun sabe cocinar…

Nun somos quien

    ¿Nun vos decatarais que los más ricos, los aforaos ya los del sangre azul tienen fíos más altos, más guapos ya más de güeyos claros? ¿Asina, como vamos espolletar los probes si nun tenemos nin el sou capital nin la súa presencia? A la escontra, tamién ye verdá que conformamos con bien poucu ya somos abondo menos señoritos qu’ellos. Alcordáivos de la princesa d’Andersen qu’echóuse sobre venti colchones ya outros tantos edredones ya-y fadiaba un arbeyu que llantanon perbaxo.

Billingüe

(Taringa.net)

      Prudente camentóu al fíu que nun-y pacía un plizcu bien qu’apuntara al sou nietu a un colexu billingüe por culpa que siempres sintiera que los de la llingua bífida andaban mui mal miraos yá que falan mal de tol mundiu. Amás, amestóu que nun-y ficiera esa fechoría al nenu ya que lu que tenía que facer yera apunta-y pa que deprendiera asturianu.

Pasáu

   

     Topéme con Antón, al qu'había bien de tiempu que nun vía, ya espetóume que finaba d’espublizar un estudiu sobre la formación de cotón nel embelicu. A lu que-y retruqué que si nun tenía otra fatada a la que referise. Darréu m’aldericóu que taba mui pasáu yá que nun m’afayaba na onda y amestóu qu’agora lu que más viende ye escribir ya falar de tonturas.

Sobro'l Ministeriu del Tiempu

     ¿Veis lu qu'andan echando na Un de televisión sobro'l Ministeriu del Tiempu? Pos eso nun ya nada. Yo tuvi nel Ministeriu del Aire de la que fixi’l serviciu melitar ya tamién me treslladaba al pasáu como los d’esa serie; namái que yo siempres diba ya tornaba en Phantom.

Caleiru

     Caleiru ya un paisanu mui duru, pero tamién abondo atuñáu, de mui bien cerca Zarréu que-y llamen asina por culpa de que dempués d’afaitar echa cal vivo na cara a causa de que-y sal más barata que la loción.

¡Adiós, Vital!

Febreru murniu de cabudaños. Tamién foi’l de Vital. Yá’l cuartu. Nun lu soi a creyer…

Adiós ríu Xinestaza,

adiós Picu Brañasín,

nun voi tornar a esa faza,

finxada nel miou maxín.

L.lora'l regueiru Solanos,

el Castru ya la Brañueta,

alcordanzas de los branos,

na solombra de La Mueta.

Berra’l Cuartu la Riera,

Tourayu ya Espinaréu,

Las Campas ya La Piñera,

amargurando Tinéu.

Morréu’l mio amigu Vital,

con esti mes de febreiru,

cerca de la capital

ya llonxe del castañeiru.

D'Asturias, Madrid y Soria,

cuentos ya caxigalinas,

nel mio cantu la memoria,

espetanon como pinas.

Déxasme abonda tristura,

anque nengún escaezu,

pos recuerdos en bayura,

m'acompañarán, davezu.

Viniesti de Pontecastru

pal pandu Nuevu Baztán,

nel camín, siento’l tou rastru,

ando alloriáu ya rabián.

EN CAMA

Gripe (Taringa).

Toi en cama cola andancia,

cola andancia y la mormera,

un mal tríu en resultancia,

pero anecien na mio vera.

¡Solidaridá pa colos sopayarieganos!

(Accesos al  Negrón pesllaos al tráficu / semeya LNA)

       Por culpa la incapacidá de tolos partíos políticos que pasanon pel Gobiernu dende l'entamu las obras de la variante ferroviaria de Payares pa llantar el ramu a esas furaduras, los sopayarieganos sufrienon el mayor ya más grave escarecimientu de sidra, queisu, vinu Cangas ya outros productos de primera necesidá que se recuerda. Por ello, en solidaridá con toa Carpetovetonia, esixamos que fine inmediatamente esa llaceria y apuren nesa cafiante estaya pa qu’entame a furrular esa llinia d’una pu… vegada.

A don Rosendo

Adiós pueblín de Surriba,

adiós fonte del palaciu,

adiós calea d’arriba,

malagustu pierdo'l xaciu.

Adiós praos ya castañales,

adiós xubida a Curniella

ya al Cuernu qu’alita males,

au la vista ía más bella.

Adiós Aicecheiru y Visu,

adiós camín de las minas,

vos dexé ensin previu avisu,

en baxando p’Argancinas.

Anque n'esqueicer t’afanes,

Sumiones ya La Pruída,

nel mezu de Campumanes,

van prindate de por vida.

Adiós: Virxe del Rosariu,

Santulaya, tan serena,

la capiya del Calvariu

ya tamién la Madalena.

Buelgas las de Santa Cruz

afitadas nel Castiechu,

onde t’eslluma la lluz

ya te fiende l’arca a trechu..

Zarrada quedóu la cueva,

en suaños quiciás la vea,

escuclando Villanueva

ya la ponte del Narcea.

La ilesia amuesa la esquela,

reparando ensin aliendu

tan los guah.es de la escuela

porque-ys falta don Rosendu.

L'asemeyu

     Topárame con Gabín que diba pasiando un Bobtail pela cai ya darréu m’entrugóu que si me prestaba’l perru. Retruqué-y que sí, que yera mui guapu ya que dábase un aire a un gochu. Entós él m’aldericóu que taba como una maniega, que si nun vía la montonera llana que tenía y amestóu que los gochos nun críen llana. Aína-y solmené que nun yera pol paecíu sinón pol arume que soltaba’l probe animal de nun lu llavar.

El roscón

     Enteréime güei de lu que-y asocediera a Milín, el fíu de Nalu, ya ¡chachu!, ¡vaya comedia!. Quixo quedar bien cola súa moza y entróu nun comerciu d’esos que vienden de tou al envís de mercar el roscón de reis más desaxeráu pa la súa ma. Foi'l casu que-y espetóu al dependiente que-y apurrieran el más grande ya con más rellenu que tuvieran a la paisana de la cai de la tarxeta que-ys dexaba. Pela tardiquina, esa muyer recibiera un sostén de la 115 espurría ya con abondo rellenu, como lu encargara.

TSACIANA

¡Tsaciana, Tsaciana, hermana!,
¿quién te quixo dixebrar?,
tsume, tseite, tsino, tsana,
cantar, tocar ya beitsar.

Pingando de Tseitariegos,
nunca separtóu de nós,
tsazaniegas, tsazaniegos,
mañana y güei, como entós.

Astures de la Tsaciana,
los tsacianiegos ufanos,
na mesma tierra galana,
tresmontanos, cismontanos.

Suene’l pandeiru cuadráu,
que toque la tsacianega,
cantando al terrén sagráu,
venga música tsariega.

Cuatro tsobos que baxanon,

pel mesmo vatse Tsaciana,

per tou Buxonte glayanon:

tsume, tseite, tsino, tsana.