P’arreglar la boca

     Servandón colóu a Uviéu a que–y arreglaran la boca ya seique trabucóu un local por outru, por culpa qu’amosaban una moza sonriendo na cristalera, que yera de los hermanos de nun te sé dicir. Foi’l casu que los dientes troxéralos como taben, magar qu’agora yá nun suelta cagamentos.

Nun tris

     Finamos de venir de caleyar, magar que tornáramos nel autobús. Na mesma parada, una muyer andaba camentando qu’había un pedazu, nel hospital Infanta Leonor, saliera un paisanu ingresáu a pasiar pel pasiellu sofitáu na súa fema ya, cuando volvióu nun tris al cuartu, decatárase de que–y pañaran las súas muletas. Anecio en que vamos per mui mal camín ya que güei, nesti país, de la que desdexas, te lleven fasta l’alma.

BMW

     Cándidu quixo mercar un BMW, como cuasi tolos asturianos, ya colóu pa Uviéu con esi envís. De la que lu espunxo nel concesionariu, –y entruganon pol modelu que–y prestaba, a lo que Cándidu–ys espetóu “¡comolvecín!”. Tando yá a puntu la robla, Cándidu refugara’l coche ya por pouco s’amarra col vendedor porque nun aportaba radiocasete de fábrica.