viernes, 28 de abril de 2017

Nel musical

    
     Como ye persabío, yo empondero ya obedezo enforma a la muyer. Güei, ensin dir más llonxe, pidiérame que la l.levara a un musical ya eiquí tamos.

lunes, 17 de abril de 2017

PANADERA


¿Por qué pintes na masera
una coleta candial
ya te fuisti de miou vera,
¡ai, panadera!, por qué será?

Naide de Cangas a Oubona
conoz la trabe de la verdá,
dicen que nun ías bona
 ya a una bollina te pudieran comparar.

Di–ys que paren en Courias,
 que van folgando, apregonando lo que–ys peta.
Pa saber las túas historias,
t’anden buscando, cómo y cuándo, la coleta.

¡Ai, panadera!,
anque la xente nun quiera,
ías la meyor de las muyeres
pos te fixo Dios la más melguera.

¿Por qué se para la xente,
namái que la ven pasar?,
por ser un aigla valiente,
que mira inxente ya echa a esnalar.

Dicen que si un escourríu,
 qu'anda escondíu, la vien ver,
seique, na vera’l ríu,
la panadera nunca quixo apaecer.
Yá foi corona de gloria
to aquel revuelu d’un desvelu por amores,
cuando'l falar de la moria
 cubrióu col velu tou un cielu de colores.

¡Ai, panadera!,
magar la xente nun quiera,
yeres la meyor de las muyeres
por faete Dios la más melguera.

¡Ai, panadera!,
del bon amante qu'amares,
cola bendición de los altares,
como manda Dios, ías compañera.








jueves, 6 de abril de 2017

101 años


     La tía cumple güei 101 años ya esqueiciera una montonera cousas ya un bon puñáu de nomes; sicasí, nun olvida Ounón –au naciera– nin Courias –onde foi a la escuela–, nin tampoco dexa de cantar l’Asturias patria querida…  María s’alcuentra nuna siella ruedas, anque ía quien a traxinar nas paralelas del ximnasiu'l sou asilu de la contorna Madrid. Como nun tien fíos, presume de nós, los sous sobrinos. Fala de daquién imaxinariu que la vien a visitar ya de dalgún requexu al que fora a xantar. Siempres anecia con que se lleva bien con toos, pero qu'a naide se-y ocurra fadiala. Alcuérdase sobre manera de Domingu, l’hermanu mayor al que matanon los marroquinos, ya de los carambelos que-y apurrían los flaires del conventu Courias de la que picaba na súa puerta. La tía María ri de los de Cangas que nun saben qu’ía una escudie!!a o un cachu y m’encamienta mandar muitos recuerdos a tolos asturianos; sobre manera, a los del sou partíu Sierra.