Nun toi viendo la tele

Non, nun toi viendo la tele,

trespandara al añu nuevu,

escuitando Radio Sele,

yá bien fartucu de cebu.

Tan españando petardos,

los nenos pela caleya,

de magar qu’ente los bardos,

toi alcordándome d’ella.

Acabante de llegar

ya fendióme la morrina,

nun me fino d’asitiar

tan llonxe de la Tierrina.

Nel intre que garre’l sueñu,

tornaré a ella outra vegada,

voi desengurriar el ceñu,

en xubiendo a una collada.

Anque de día en Madrid,

de la que me duermo a fondu,

paso la nueite, feliz,

per Xarceléi o Parrondu.

                        

Efeutos secundarios

     El xueves pasáu atopé a Tolinu aspirando del tubu l’aire na gasolinera de Soutu la Barca; asina que-y arreprendí: “Home nun faigas eso, que tien que ser mui malo pa los gases”. Entós Tolinu me retrucóu que contaba con que tendría dalgún efeutu secundariu, pero que'l mélicu-y espetara qu’andaba con muita depresión ya que tenía qu’alitar aína.

Güei'l mio bon amigu Nel apurrióme esti billete, a lu que-y retruqué:

Yá imprimí’l billete, munches gracies, voi ver si soi quien a pasalu mañana na churrería...

Un candial abrazu pa toos,

Pin

El gatu de Ponferrada

Ello yera una vegada,

un vecín que troxo un gatu,

un gatu de Ponferrada,

que-y mexóu nel garabatu.

¡Mira que sos gochu y fatu!,

pegando-y una patada,

el vecín espetóu al gatu,

que tornóu pa Ponferrada,

yá que mancara al mixín,

al probe, la costalada,

según te cuntara, Pin,

con esta Pimpirulada.

Nel Partíu Sierra

Qué llonxe ta a!!á acu!!ó,

seique ta mui bien al norte,

per onde’l vecín coló,

ensin pagar nengún porte.

Pel camín que va a la braña,

pela vera'l ríu Xunqueras,

onde la nublina españa

ya abellugan sacaveras.

Per onde esbarian nel xelu,

los tarucos las madreñas,

per au cayera’l mio güelu,

esguilando pelas peñas.

Onde s’esfrez col iviernu

y afalaga en primavera,

onde’l silenciu ye eternu,

ya esnálase na túa vera.

Eiquí llueven las estrellas,

cuando la nuoite ta rala,

de la que trancan las pellas,

ya ta folgando la pala.

A lo cimero’l cumal,

voi glayar la mio tristura,

seya pa bien o pa mal

ya escaecer la gafura.

Asina nel paraísu,

voi refugar toa guerra,

anque nun me faigan visu,

llantáu nel Partíu Sierra.

Nun taría de más que...

     Celu ya Delina son una pareya de lo más románticu. Voi amestavos qu’anque nun son nuevos, son inda más románticos  qu’esas pareyas que llántanse nel mediu la cera pa llambese’l focicu ya nun dexan pasar. Tolos días, dende fai cuantayá, baxan fasta la estación del Alsa en Cangas, un cuartu d’hora enantes de que salga’l coche llinia que cola pa Uviéu a las 10 de la mañana y despídense, afalagándose ya dándose chuchinos. De magar que parte l’Alsa, ellos tornan de nuevu pala súa casa, tan contentos de siguir xuntos. ¡Nun taría de más que dalguno deprendiera...! 

Los más gochos nun tan en cubil.

     De la que se recorten los fondos de proteición, llénense los fondos de la mar de basories. ¡Echemos un gabitu nun emporcando sableres nin cantiles y riñendo al que lu faiga!                

Bien preparáu

Nun vayas creyer que namái soi quien a escribir relatos, poemas y caxigalinas, que nun ye asina. Tamién, de la que xanto, echo más faraguyas pal pisu que los demás. 

Más fiadores

                                                                   ( Soleya: Xulián Foto)

     Bien seguro que los bancos, por mor de las nuevas midías que se tan iguando, van acutar ya amenorgar los créditos hipotecarios; asina como pidir más seguridá pal sou cobru ya más fiadores (avalistas)...

PATACU

     A Patacu, llámen-y asina por culpa de qu'esfardanóu’l coche al cayer pa un patacal. Asocedióu que Patacu, que ye mui atuñáu, nun prende’l contautu ya baxa d'un de los pueblos más altos de Cangas en puntu muertu por aforrar. De magar que’l vehículu esbarióu, tuvo la suerte de finar nel patacal ya non nun espeñaderu camín nel campusantu. Sicasí, paezme qu’esa nun foi la más gorda, yá que Patacu cortexaba una moza alta, mui curiosa, ya de la que lu vi l’outru día, diba con una muito más ruina. Entós, ayeri que lu cucara solu, entrugué-y pola guapa ya retrucóume que camudóula por esta, a causa de que tien menos tara ya, como-y pesa abondo menos la cadarma, gasta-y de xuru menos gasolina.

The cleaner type

     Bernaldo inda caltién un Seiscientos col radiu casette seique más vieyu, furrulando dambos, ya güei, de la que baxara a Cangas, entróu nun comerciu, au tovía vienden dacuando en vez dalguna cinta, con una na mano. De magar que-y entrugara la dependiente por lu que-y petaba, Bernaldo retrucóu que facía cuantayá que mercara eillí dellas cintas ya que toas las sintiera enforma bien, esceuto esa que-y amosaba del conxuntu inglés Los Cleaner Type que debía tar estropiada ya que venía por si nun-y poníen torga en camudala por outra de Tarín de Sotrondio.

DECENTES

     Andaba enredando pel Feisbuk, cuando topé un cartelu qu’asoleyaba una amistá cola llectura: ¡”Apoya a los docentes”! Asina que, de secute, xunime a la so campaña cola mio parolada de sofitu...

     ¡Güei yá queden pocos decentes. Hai qu'echa-yos un gabitu!

¿Quién...?

     Habrá un mes que la muyer espetóme que yo cuasi nun falaba más que d’Asturias. Amestóu qu'asina nun podemos tener una conversación seria. Pola mor d’ello, ando agora al debalu, tras d’ella, aldericando-y: —Ven ne, que vamos tener una parolada seria; a lu que me y-retruca: —Anda ya vete per ehí, que tas como una maniega. Asina que quedé cavilgando que nun hai quien entienda a las muyeres.

     Cantar “El valse la xata pinta”, col son del Valse las Caparinas (mariposas), apurríu a los amigos de La Cirigüeña...



El valse la xata pinta

Pasiando pel corral, diez xatas pintas,

entamaron a berrar pidiendo xinta,

la más guapa la que tien la meyor pinta

diba blincando hacia ti, sudando tinta.

ESTRIBILLU

 Dime si tu, güei,

quies baillar esi son

del valse la xata pinta, conmigo.

Quiero baillar, sí,

quiero baillar esi son

del valse la xata pinta, contigo.

Cada día nel corral te veo Xinta,

como una de las diez,

diez xatas pintas,

tu enseñástime a baillar, sintiendo cintas,

una tarde nel Rosariu, Cabañaquinta.

¿QUIEREN ESFARDANAR ASTURIAS?

  

    

     Caye'l númberu de turistas n'Asturias, cuando la mayor parte de los foriatos torna mui satisfechu. ¿Cuál ye la razón?

     Alcordémosnos que de Madrid ya Castiella llegase a Galicia per autovía ensin desembolsu dalgunu, en pasando Adanero. A Santander, de la mesma mena, y al País Vascu, tamién de baldre. L'agraviu comparativu con Asturias rescampla; en pagando'l peaxe del Guadarrama, el viaxeru tien d'abonar el segundu peaxe del Güerna que nun dexen de xubir, cuando yá hai bien d'años que prometieron desanicialu.

     La eleición del ferrocarril amuésanos la imposibilidá de garrar el tren na céntrica estación d'Atocha en Madrid, media hora afitaos en Llión ya trespandar el Puertu Payares por aciu de que las obras del AVE van camín de perdurar tantos años como la construcción del Monasteriu del Escorial.

     Lu asoleyáu llévanos a planteganos la siguiente entruga: ¿Quieren esfardanar Asturias?

    

El Cortáu

    
     Milín vivía solu nuna casería d'un d'esos pueblos asitiaos na raya con Galicia au nun pasa más que l'orpín y el panaderu. Ente’l terrén ya las vacas, de contino andaba apuráu ya nun falaba con moza nenguna. Amás, como yera enforma curtiu, un par de vegadas afayadizas nas que pintóu la ocasión pela fiesta la parroquia, seique no finó d’arrancar. De magar que cumplió 40 años, ya nun queriendo quedar ensin pareya, baxóu a la villa ya garróu un Alsa pa Uviéu decidíu a que’l sou destín camudara. Nel intre, entró nuna cafetería y, namái qu'una moza malapenes curiosa pidiera un cortáu, marchóu con ella pa siempres.

El teléfanu de Xuacu

     De la que llantaron la llinia en Sierra, fai cuantisimayá, m’allugaba en casa de Xuacu que ye un collaciu de la redolada Vi!!auril. Cuando colé, y-pidí'l teléfanu pa charrar con él dende Madrid ya esti paisanu, que siempres foi mui dispuestu, de sópitu, arrancólu de la parede ya me lu apurrió. Dende entós, el teléfanu de Xuacu colinga nuna muria del mio chigre; sicasí, nun fui quien a falar con él pos quedara desconectáu.

Las edaes de Lulo

¡Qué cousa más guapina!

¡Esti nenu nun va morrer de fame!

¡Cuánto medróu esti mozu!

¡Qué gayoleru ye Lulo!

¡Esti home ye mundial!

¡Lu que camudóu esti paisanu de magar que se casóu!

¡Nun representas pa nada la edá que tienes!

¡Curie nun vaya a cayer, qué va esfardanar la cadarma!

¡Qué bonu ya candial yera!

Na Fashion Week

     La moda nun ye esclusiva de los nuevos. La xente menos moza tamién tien derechu a vistir “al caberu enclín”. Eiquí na soleya, esclucamos a duas paisanas que van cruciar la cai, a la vera’l mesmu Pasu Cibeles de la Villa y Corte, con ropa espantera de plena actualidá del afamáu modista Xicu Rabanne nel desfile de la Fashion Week to Ministry of Industry.

¡UNA BONA NOVEDÁ!

El paru baxa en 98.853 personas nel meyor mes de xunu en 16 años.

Por sectores:

—40.000 tornaron al so país.

—10.000 colanon pa l’Alemania.

—48.840 contratáronse como esclavos internos pola voluntá

        y 13 escaecieron l'aldu ya la memoria por culpa de los recortes y naide sabe au tan.

Pa revisión

    

     Dos amigos alcontránonse na mesma antoxana del hospital de Cangas, ya un d’ellos entrugóu al outru:

—Xintu, ¿aú veis con esi radiocasete tan vieyu?, ¿tienes daquién ingresáu?

     A lu que’l sou collaciu entós retrucara:

—Non ho, ye que'l mélicu enteróuse de que fixera yá los 55 ya empobíname al urólogu encamentándome que ye pola cunta que me tien revisar l’aparatu reproductor.

SILENCIU

     Bien avanzáu marzu, l'iviernu mañaneru y agonizante calecía col restal.lar d'una naciente primavera. El mofu la fonte asitiaba taramingos palos l.limiagos. Al traviés del asfaltu la pista, la vida s'afitaba nas tremadas plantas. Un fumu blanco remanecía na recia chimenea de la casona, espardiendo al altu la l.leva l'arume la xanta. Un pitu repol.ludu cacarexaba ayén al so cruel destín. El regueiru paecía esbariar la mesma agua d'hacía cuarenta años, de la que Marina nun tiñía canas nin los riegos frayaban la so cara. L'esnidiosu camín del monte consentía azorronar que'l tiempu desendolcaba ensin remediu. La xaronca pruyía seliquín por tresmitir nun sé qu'hestorias. La tarde diba atapinando pel val.le ya la nublina pousaba nel so fondu. L’airín escarmenaba las barbas de los pinos de la redolada, mentanto que los esquilos fuxían espavoríos. La l.luna asomóu d’esmenu pel finxu’l cielu sorradiando alpaca escontra la escuridá invasora. L'aldega diba prendiendo cola so arribada en febles l.luminarias. La quietú hinchía adulces l'ayena harmonía nun silenciu que resalvaba indiferente de la estrueldosa civilización. Benditos los que pueden esfrutalu.

Traxicomedia n’Uviéu

La receicionista d’una clínica de guapura d’Uviéu muerre con tan sólo 27 años...

     El pasáu xueves 31 de mayu, morría de risa una rapaza de tan sólo 27 años que trabayaba como auxiliar nuna clínica de guapura d’Uviéu. Paez ser que la desgraciada moza morréu dempués de rir a estazón alredor de dolce minutos, tras atender a un veceru de Ponticiella (Cangas del Narcea) que se presentó na consulta con 2 vacas non culonas col envís de que-ys iguaran l’aumentu de gluteu qu'espublizaban nel cartelu la cai.

PIXÁN

Del paraíso asturiano,

Cangas es su corazón,

donde nació este paisano,

donde fraguó su canción.

El más célebre tenor,

la más melodiosa voz,

para L.lumés, un honor,

de Los Fueyos, portavoz.

Hablo de Joaquín Pixán,

innecesaria reseña,

ya La Scala de Milán

sintió su expresión cimbreña.

Sentenció la Caballé

que su voz es la más bella,

hasta juega al balompié,

nuestra peculiar estrella.

Su dilatada carrera

y su trabajo fecundo,

además de España entera,

le han hecho correr el mundo.

Veinte discos editados

lleva el genial erudito,

mil amigos, encantados,

al ser, también, un bendito.

NIN MESSI NIN EL MADRID, NUN HAI QUIEN “BATA” AL ATHETIC DE LA 30/31

El Madrid de Mou finaría agora mesmu con 3,08 goles per partíu escontra l'Athletic de l’añada 30/31 que marcara 4,05 per alcuentru. El lleón Bata ya l'uviedín Lángara marcanon 27 tantos en dos lligas con 18 partíos (30/31 ya 33/34), pa una media de 1,5 goles per alcuentru. Pue que'l Real Madrid de Mou seya yá l'equipu qu'anotó más goles nuna temporada ya que Messi atropara más que naide; sicasí, nin unu nin otru pue colas medias goliadoras del Athletic de la dómina 30/31 ya la del sou “killer”, Bata. Pa poder papar el datu, nada meyor que comparalo col Real Madrid d’anguaño, que lleva 117 goles a falta d'un partíu. Atalantemos que'l Madrid nun ve puerta ante'l Mallorca. Asina, acabaría'l campeonatu con 3,08 dianas per alcuentru. Esto ye, casi un gol menos per partíu que l' Athletic de va ochenta años. Ye más, si daquién quier espolletar la marca —colos 38 partíos que se xuegan na actualidá—, tendría de cucar puerta 155 vegadas.

La dubia de Milín

Un maestru desplica a los nenos como se desendolcara la Invasión Francesa ya la Guerra la Independencia, col refugu de los foriatos. Namái finar, Milín entruga: —Don Florín, ¿cuántos yeran los invasores? El maestru retruca: —Fonon miles, Milín. ¿Porqué me lu preguntas? Milín alderica: —Ye que nun sé si daquella los españoles yeran toos racistas o ye qu'agora, como entraron muitos millones, andamos toos cagaos.

UNA BONA NOVEDÁ

La paisana del 2º anfiateatru que recibió'l balonazu de Ramos nel llanzamientu del sou penalti nel caberu partíu del Bernabéu alita favorablemente. Sélu enforma bien, ya de mano, por culpa de que tuvi visitando a una pariente nel hospital Clínicu, eiquí en Madrid, ya diera la casualidá de que taben ingresadas las dúas nel mesmu cuartu.

ADIF esplica...

Lena prueba la resistencia del AVE.
Concluye la obra del viaducto de Sotiello, clave para la entrada de la alta velocidad en Asturias (La Voz de Asturias, 18-4-2012)
...El tramo Sotiello-Campomanes, en el que se ubica el viaducto, tiene una longitud de 4,3 kilómetros y en las obras de construcción de la plataforma se han invertido ya del orden de 119 millones de euros. El trayecto incluye también los viaductos de Teso y del PAET, y los túneles de Sotiello y de Teso. Todas estas estructuras están finalizadas. Desde el Adif explican que “la construcción del corredor de alta velocidad entre León y Asturias contribuirá a la vertebración socioeconómica del Principado de Asturias y reducirá los tiempos de viaje actuales”. “Asimismo, contribuirá a mejorar la seguridad con la aplicación de nuevas tecnologías y de los sistemas de conducción automática de trenes”

· Pindesierra 18.04.2012 - 11:34h (caberu comentariu na Voz enantes del pieslle)

Esto yá lu entendimos ADIF, lu que debéis desplicar ye cuando van a furrular los furacos de Payares d'una puñetera vegada y cuando vais dexar de perder media hora en Lleón.

Las Plantiyas

Rufu entróu a una papelería de Cangas ya mandóu faer 3 fotocopias d'una plantiya calzáu. De la que las garróu, cucóulas con procuru ya encomendóu faer outras 20. Un conocíu que taba a la sou vera entrugóu-y extrañáu pol envís. Rufu y-retrucóu que fendiera la outra plantiya ya que las fotocopias y-costaban a 10 céntimos, mentanto que polas plantiyas habían-y mangáu un euru, o seya a 50 céntimos caúna; asina que-y valían enforma más baratas la fotocopias y había que retayailas igual.

Cefalópodu

Los alienígenas marinos llegan a Asturias.
El centro del Calamar Gigante de Luarca expone una curiosa muestra de 60 especies de cefalópodos (La Voz de Asturias, 30 marzu 2012).

Na mio empresa tamién hai un cefalópodu; pero nun ye alieníxena, ye de Mondoñéu.

¡Tará gafa!

La Nasa descubre indicios de agua en Mercurio (La Voz de Asturias, 23.03.2012)

¡Pos vaya nueva!, si l’agua la topanon n’azogue (mercuriu), nun val pa nada por culpa de que tará envelenada.

VINU de CANGAS

Fai una montonera d’años, nos chigres de Cangas, pidías un vinu Tierra ya apurríante vinu agrín del conceyu en vasu o en escudie!!a. Yera de cualquier veceru al que se-y mercaba la sou collecha; sicasí, nun sabías davezu de quien yera exautamente. Güei'l vinu Cangas vien nuna afayadiza botella con nome y apellíos ya ye un vinu célebre de sonada calidá.

¡Nun seyas cabestru: nun ye malu beber vinu bonu, ye malu papar vinu malu!

TORNAR A LAS RECUAS

La prensa de güei porfía en qu'inda nun hai fechas pa finar las obras del AVE, nin siquiera pa qu’entamen a furrular los furacos de Payares. Ente las allanzas (retrasos) y torgas d’unos ya outros, el trespandar Lleón cañicando adulces, las xubías del carburante ya las tasas de las autovías, vamos tornar a las recuas ya’l carru’l país. ¡Al tiempu amiguinos!

EN BILLETES

Acarretando nel bolsu’l sueltu acumuláu en 3 o 4 años, achisbé en dalgunos bancos col envís d'arrexuntar los mios dineros. Arrenuncié del intentu al alvertir las monumentales colas que pingaban de las respeutivas caxas. Caleyé hasta la terminal del ALSA y decatéme de la soledá d’un arrequexáu despachu. Rogué al emplegáu'l cambéu de la chatarra por un par de billetes, a lo qu'aportó ensin torga; sicasí, abandoné'l llugar atristuráu con unu pa La Puela y outru pa Tinéu.

El nenu de Bras

Bras ye un paisanu mui despistáu que mora nun pueblín del partíu Sierra. La cabera selmana foi a mercar un armariu pala sala al Parque Principáu. Ei!!í, mentanto echaba una güeyada, dexóu al sou nenu que ye mui revolvín arrequexáu nuna guardería d'un hiper mui nomáu. De la que colaba, acarretando l’armariu pal coche, garró un rapacín que nun yera'l suyu ya nun se decatara fasta la vera l’embalse Pilotuertu. De magar que viera qu’ésti yera más bonu ya mansulín que'l de sou, caltuvo al guah.e trabucáu ya nun tornóu pa camudalu.

VEZOS CULTURALES

¿Volvimos llocos?

Con 5 millones de paraos, con salarios esfamiaos a mamplén, con pensionistas conxelaos, con condiciones llaborales cada vegada más repunantes, con llicenciaos en práuticas ensin cobrar un euru, con xubías esponenciales en servicios como la lluz o'l gas: “Wert va apurrir más dineru al toréu por ser un bien cultural...” (La Voz, 3-2-2012)

Mas nos val el desaniciu de cualquier vezu “cultural” de tortura animal, yá.

Xintu'l Duru

Xintu yera un paisanu cermeñu de Monasteriu. Yera tan duru qu’espolvoriábase zufre nos sobacos en l.lugar de desodorante ya nun se-y arimaban las mozas de lu qu’arrecendía. Un día, caleyando per Cangas, agüeyó un cartelu qu’espublizaba: SEGUROS DE VIDA. Nel intre, xubió au la compañía seguros col enfotu de contratar un; sicasí, de la que papara bien l'asuntu, baxó aína las escaleras reburdiando: ¡Vaya mierdu de seguros de vida que nun son quien a afitala!

De sestaferia

Ansí yera’l ciclu’l pan,
en L!uarnes, la farina
amasábala Patán,
tras pineirala Marina.

Enantes, chaba Pimientu,
de la qu’amestaba solu,
pa que !!eldara, formientu,
dempués, arroxa Pistolu.

Asina, n’aque!!a faza,
carretada a la panera,
la mui sabrosa fogaza,
dormía na fogacera.

Davezu de mancomún,
el vecín de sestaferia,
agabitaba a caún,
de cutiu, de feria en feria.