Una bona sida

     Amador xantara nun gastrobar del centru Madrid ya darréu entróu-y una gastroenteritis con cagalera ya abonda foria. Sicasí, esclarióume la súa sida de que nun reclamara porque él nun yera de riquir nada ya, arriendes, nin siquier yera inglés.

El mecánicu

     El 127 que yo gastaba, allá pelos años 70 del pasáu sieglu, amás d’esguilar per cualesquier pista, yera abondo raru que nun furrulase; sicasí, tamién s'estropió dalguna vez. Foi’l casu que daquella la mia ma ya yo quedamos tiraos nun pueblu na raya de Tinéu con Cangas ya, mientras yo caciplaba en motor, ella entrugara a una paisana que traviesaba la calea d'esta miente: "¿Oiga, nesti pueblu nun hai nengún mecánicu? A lu qu'aquella muyer retrucóu: "Non señora, non, nesti pueblu son toos mui burros".

Quiero a Tuña

          

De los mious poemas del Cuartu la Riera: “Quiero a Tuña”, dedicáu a tola bona xente del Cuartu col envís de que seyan a sestaferiar nuna nueva edición del sou yá afamáu “Festival de la Lana”.

Amo a Tuña en soledá

ya la soledá de Tuña,

esi Cuartu onde ta

ya la guapura que truña.

Por palacios ya casonas,

pola ponte del Carral,

por horrios ya fiestas bonas,

Tuña ía la principal.

Qu’un príncipe la premiara

por ser el pueblu exemplar,

onde’l Cristu s’afitara

ya Pipo asitiara’l bar.

Onde nacéu Rafael Riego

ya’l Festival de la L.lana,

au güel a pote en tariegu

ya la moza ía galana.

Nun hai tan guapa val.lina

como na que Tuña afaya,

de Fátima, la Santina,

ya, la Fana, la qu’argaya.

Pende fila’l tarañón

nel verde per tola faza

ya aruma’l café tizón

dende l’escudiel.la o taza.

Pueque daquién nun la vea,

si nun mira pal cartelu

ya traviesa’l ríu Narcea,

somorguiándose nel cielu.

Quiero a Tuña de verdá

por tar aislada del mundiu,

pola propia señardá

ya pol sou raigañu tundiu.

Camilu'l lateru

     De la que remocican las murias de las casas, despinten las súas vivencias. Dacuando, los paisanos nos las recuerden…

Ello yera, como un peru,

un maestru cola lata,

malabarista y lateru,

enxamás de mala data.

Fora’l cuentu de Camilu

que venía dende Ourense,

nel sou pullu al vilu vilu

pal conceyu tinetense.

Paraba per Ricastiel.lu,

agospiaba en casa Fonsu,

falaba col burru a trechu,

que–y escuitaba’l responsu.

Había un cuartu col sou nome

ya asina remaneciera,

n’alcordanza d’aquel home,

pol sou xeitu y bona xera.

Al ablugu un corredor,

la zapica o la cacía,

machucaba con amor,

ayén a toa rensía.

¡Tincla, tincla, tincla, tincla…!,

ruxe la onomatopeya

del soníu de la incla,

so’l moldu, llata o la reya.

Discutía con Celesta

cuando axustaben el preciu,

–y espetaba Agosta a esta,

poníanse a cuál más neciu.

Magar s’algamaba’l tratu

nel duru tira ya afloxa,

adulces pasaba’l ratu,

del neno’l tiempu de goxa.

Anque yera dalgo ranciu,

nun se punxo repunante,

al son de martiel.lu y banciu,

vivióu del fierro’l mercante.

Colaba siempre a Zarréu,

al l.lombu del sou pollín,

ía una historia de Tinéu,

qu’a Tino aportóu’l destín.

La llámpara d'Aladín

     Aladín, al que siempres se–y vía caleyando per Cangas con mui mal xeniu, alcontrara una llámpara a la vera la Ponte l’Infiernu cola que s’electrocutóu al coneutala colos pies moyaos. En resultancia, arriendes de perder el xeniu, nun se–y volviera a ver a él tampoco. 

Tresfusiones

     

       Constante, que siempres bebió muitu, careciera un accidente abondo grave allá pelos Santos que–y caltuvo bien de tiempu ingresáu nel Severu Ochoa. Foi’l casu que–y punxenon una montonera tresfusiones de sangre ya, como nun reaccionaba, llantánon–y de vinu de Cangas hasta que’l vienres pasáu–y dienon l’alta.  

Cantar de cuquiellu

(Semeya, Fotonatura)

Cuquiellu, cuquiellu,

col rau de perru,

di, si ías a ello,

si diré al tou entierru.

Cuquiellín del rei,

col rau a la moda,

dime que nun sei

la data mía boda.

Oi cucu de mayu,

con rau d’anguila,

nun lleves el bayu

col cestu maquila.

Col nial faes trucu,

nun ía faza túa,

de cucu rabucu,

ía la falcatrúa.

Guapu’l tou reclamu,

guapa la túa xera

d’anunciar l’entamu

de la primavera.

Cuquiellín del rei

tas feitu un mangante

ya, col tou xerséi,

vas mui elegante.

Daste caramiellu,

añu d’importancia,

cantar de cuquiellu,

pala nueva albancia.

Pela aproximación

     

     Nunca pasara vergoña tala como la que pasé esta mañana aínda ceo. Foi’l casu que m’alcontrara con un conocíu de Courias pela cai Atocha ya tuviéramos un pedazu caleyando. De sópitu, va ya-y manga una hostia a un home col que cruciamos que-y arrefundióu escontra un quioscu prensa nel que yo finaba de mercar LNE, quedando tola xente mirando pa nós. Al entruga-y que de que conocía a esi infeliz, retrucóume que de nada, pero que se paecía muitu a unu que–y cayía mui mal.

Las mozas de Málaga

     Estas mozas tan serias nun son parientes nin amigas de la muyer. Estas rapazonas tan serias nun son amigas nin col.lacias del miou fíu. Estas mozas tan serias, a min, nun me conocían de nada. Foi’l casu que, de la que caleyábamos anteayeri per Málaga a la vera la catedral, –y entrugóu una al miou fíu que si–ys podía facer una semeya col sou móvil. Estas rapazonas tan serias entamanon a espaturrase de risa de la que yo, que tenía la mía cámara na mano, aproveche pa tamién saca–ys una foto ya por culpa d’ello asoleyanon nella tan sorrientes.

Soi Cangués

Vicente Prado Suárez, “El Pravianu”, nacéu en Viella (Siero) en mayu de 1964. Ía un de los más afamaos gaiteros, amás de los constructores de gaitas. Con namái 14 años entamóu a presentase a concursos. En 1989, empecipia la súa andadura como maestru de gaita. Tamién foi monologuista. Cuenta con bien de grabaciones en solitariu: -Ríu Verde (1987) -Viniendo de Maliayo (1998) -El Pravianu (2000) -Vicente Prau “El Pravianu” (2006) -Mano a mano (con Pepín Carbayos 2011) -El Pravianu toca y canta (2014), onde tolos cantares tan compuestos por él. Como se deduz d’esi caberu trabayu, El Pravianu canta al tiempu que toca ya darréu vamos sentilu en “Soi Cangués” nesti vidéu recién colingáu pola Nozal Groove.

¡Malditos seyan!

 (Semeya de Salvador Sas pa l’axencia EFE)

     Asturias, Galiza, Llión ya Portugal nun queiman. A Asturias, Galiza, Llión ya Portugal–ys prenden fueu. N’Asturias, Galiza, Llión ya Portugal nun muerren los paisanos. N’Asturies, Galiza, Llión ya Portugal maten a los paisanos. A la fin, paez que decatánonse, o quixenon decatase, de que la mayor parte de los cientos de queimas son provocadas. ¡Norabona pol discurrimientu! Agora namái falta que garren a tolos culpables ya que paguen pola súa fechoría replantando las fazas amburadas con árboles de raigañu. Si hai que camudar las lleis pa torgar qu’esto se vuelva a producir, que se camuden, qu'hai bien d’años que tamos careciendo esta llaceria. Arriendes, de nuevu necesitáramos el sofitu celestial pa que nun arrasara cuasi tou. D’outra miente, siempres comenté que n’Asturias vivía la meyor xente del mundiu ya qu’a la escontra tamién pues atopar a daquién de la peor. Esa triba de bestias que nun tien un rispiu de sensibilidá, los que queiman ya los que manden queimar, nun son a algamar el sentimientu hacia’l próximu que pue tener un animal como’l de la imaxe, yá que pa min s’alcuentran nun pasu evolutivu inferior. ¡Malditos seyan! 

Constipáu de Tuña

Troxe un constipáu de Tuña

ya un furacu nel calcetu;

pel furacu, sal la uña

ya a la deda nun pon vetu.

Nun llevé la pañoleta

cola qu’arrodiou’l pescuezu

ya la garganta m’enceta

si nun l’aporto davezu.

Baxóu la temperatura

ya’l pañuelu quedóu en coche,

garrara ansí la malura

ya, d’esa visita, el broche.

Ando agora tusicando

ya sonando la mormera,

cola mormera sonando,

monto gran escandalera.

Lo peor ía cuando espirrio,

por culpa del españíu,

por alitar yá me pirrio,

enantes que venga’l fríu.

Ía que dempués nun sal

l’andancia del resfriáu,

nengún remediu me val

ya fino abondo alloriáu.

L’alcordanza d’aquel día,

nel pescuezu, remanez,

entamu de pulmonía

ya la napia que m’esfrez.

Lu meyor d’esti catarru,

ía qu’en Tuña lu garré,

foi asina, como lo narro,

con un furacu nel pie.