ÚLTIMA HORA

PRINDANON AL RESPONSABLE CABERU DE LA PÚNICA

Según fontes averadas al Beberciu, nuna operación conxunta de tolas fuerzas d’orde, prindanon a un norafricanu na ciudá de Saguntu como responsable caberu de la Púnica. Al paecer vivía nuna escomunal finca en compañía del so xenru arrodiaos d’una desaxerada montonera elefantes que caltenían ensin nenguna clas de permisu.

Queima Armayán

(Semeya, LNE)

     El nuevu focu del monte Armayán (ya esto nun son bardayos) s’amiesta a los 14 fueos que tán activos nel Suroccidente, nos conceyos de ¡Tinéu, Cangas y Allande!, nos que'l Principáu caltién activu'l Plan de Quemas Forestales del Principáu d'Asturias (INFOPA), en situación cero, esto ía, de “siguimientu”.

     Pos, siguimos: cuantas casualidaes aportan de casualidá por casualidá…

Queima Surriba

     Arde outra vez la redolada Surriba en Tinéu ya tornará a amburar de la que cuadre. Dalgo falla cuando la política escontra queimas nun furrula. Nun pue ser qu’haiga más xente col envís de queimar que paisanos col procuru d’apagar. Nun pue ser qu’haiga más pirómanos y aventaos qu’aldeanos con un plizcu de xacíu. L’Alministración tien qu’aconceyar cola xente’l campu pa sentir lu que-y esmolez. Hai qu’alcontrar soluciones y facilitar terrén ermu pa chiscar el bardayu y outras pa que nun se prenda por culpa dellos intereses somorguiaos. Hai qu’apautar pa que nun queime la nuesa bayurosa viesca ya per ende la fauna qu’acorica. Agora, a poucu arroxen los muertos nel campusantu Surriba ya cualesquier día pue morrer dalgún vivu ensin posibilidá de torna atrás. Nun quixera escaecer qu’hai unos años tuviera yo namái apagando’l fueu nesta mesma faza, mentanto una cuadriella profesionales aguantóu agüeyándome alredor de 10 minutos enantes d’intervenir. Güei, un númberu de Proteición Civil riñera con un llabrador pa que-y aportara la súa pala goma cola que torgaba que’l llume nun algamara los sous rollos de silu. ¡Tamos preparaos!

Rigu Esva

Rigu Esva, rigu Ese,

agua y sangre de Tinéu,

del Bárcena y Grande’l cese,

onde’l sou cruz ya l’apéu.

"Anque yo sou de la vera,

del occidente’l conceyu,

andecho na mesma xera,

magar que vou siendo vieyu.

Duelme’l ver qu’a la Tierrina

la tornan gafa ya rala,

ensuchan súa verde clina

ya desanician la fala.

¡Dómina de nuesos güelos,

d’un pasáu non mui llonxanu,

falaban baxo estos cielos

toos dafeitu asturianu!

Güei, que colara a la Corte,

vos entrugo día a día:

¿Aú ta la brenga del norte?,

¿la d’estas Asturias mías?

Pente yérbadu ya umeru,

pente’l Cantón ya l’Arena

refundiemos, compañeru,

la túa agua y la mi pena”.

Asina respondéu’l ríu,

con un quexume bien fondo:

esparde’l común sentíu,

que yo yá esbariara abondo.

Esmolecíu

(Recuperación difusa)

      Tenéis que me perdonar si m’alcontráis abondo esmolecíu, ye por aciu de que tuvi ayeri na doctora ya, d’entamo, pasara hora y media reconociéndome por culpa de que yá nun s’alcordaba de min. Foi’l casu que marchanon tolos demás veceros que citaran darréu, esceuto ún que lu ingresanon con ansiedá. Yá, a lo cabero, cubrióu aína un volante ya espetóume: —Pin esto yá nun tien igua pos veo mui difusa la recuperación. Voi mandate al especialista’l PIVE, por mor de qu’andes mui mal de chapla ya de que la mayor parte de las túas coradas furrulan damecío, pa que t’asitie en llista d’espera pa una urxente reencarnación hospitalaria. 

El gondoleru

     Fina d’espetame un vecín na escalera, y ensin venir a cuentu, que marcha cola muyer dolce días a Venecia. Darréu-y retruqué que lu sentía y que nun esmoleciera por culpa la humedá, el mal fedor de las canales y de qu’amorie la fema al saliar nas góndolas que’l tiempu pasa volao y aína van tar de vuelta.

CORRÍU DE CANGAS

(Los Cadavales, semeya de Ridera)

Voz de la tonada mía,

 al espertar la mañana,

quier cantar la súa allegría,

 a la mi tierra asturiana.

Yo-ys canto a los sos montes,

los sos praos, valles ya flores

a viescas, ríos ya fontes,

de Cangas de mios amores.

Conceyu verde y queríu,

si muerro llonxe de ti,

que digan que toi dormíu

ya que me traigan eiquí.

Que digan que toi dormíu

ya que me traigan eiquí,

conceyu verde y queríu,

si muerro llonxe de ti.

Que me sotierren en Sierra,

perbaxo Los Cadavales,

y me cubran d’esta tierra,

trubiecu d'homes cabales.

Son de la tonada mía,

nel riscar de la mañana,

 quier cantar la súa allegría,

a la mi tierra asturiana.

Conceyu verde y queríu,

si muerro llonxe de ti,

que digan que toi dormíu

ya que me traigan eiquí.

Que digan que toi dormíu

ya que me traigan eiquí,

conceyu verde y queríu,

si muerro llonxe de ti.

¡Esconxurái!

    Yá afueguen o maten fasta a los duendos. Vamos morrer toos encetaos o d’un tiru pela viesca. El que sepa dalgún esconxuru qu’esconxure.

Arde Valledor

                                                                      (Queima 2011)

El fueu abrasador ya provocáu,

ya llapada qu'afara l'occidente,

medrana que s'afita en tanta xente,

desastre cada branu soportáu.

Xamusquen Valledor ya'l so vedáu,

aguanta'l llabrador siempre prudente:

mal vezu de dalgún llocu inclemente

qu'en áscuaras camuda’l Principáu.

Queimen casa ya escuela en San Martín,

arruina l'etnográficu muséu,

la llama s’acolumbra en Coucellín,

en Cangas, en Miranda ya en Tinéu.

Castiguen al culpable pol so enclín,

 que muerre la mi alma en Berducéu.

¡PAÑÓME LAS ZREIZAS!

     Un golfón como ésti me papóu tolas zreizas d’una zreizal, magar que tuviera cubierta con una rede ya seique nun me van indemnizar. Amás, sé onde vive de baldre. Anda de caseiru pel miou terrén. Sicasí, anque yo soi del rebañu fatos a los que frin a impuestos, que naide esmoleza que nun-y voi aventar del nieru por culpa de que respeto muitu a los animales. De tala miente, nun ya precisu qu’aporten los “antideshaucios”; pero, como’l mierlu viniera de fuera, ando con mieu de qu'arriendes-y tenga qu’apurrir una paga.

Ensin futuru

                                                                (Semeya, APV)

     “L'asturianu Fernando Alonso dirixe'l primer vuelu de prueba del Airbus tras l'accidente. Esnaló ensin incidencias una hora ya 50 minutos” (na prensa de güei).

     Yá se m’abultaba a min qu’en McLaren nun tenía futuru.

Xorra

     ¡Miánicas!, hai días que paez que llevanta ún del xergón con xorra. M’anduviera mancándo una muela de la filera d’embaxo ya m’averé a una clínica dental al envís de que me la sacaran. Foi’l casu que taba mui agarrada ya, de la que tiróu’l dentista con muita fuercia, nun sólo me llevóu esa pieza sinón outras tres más de las d’enriba. Pos, ¿vais creyer que nun me cobróu nada?

(Si daquién de los amigos del Feisbuc o siguidores de los mios blogues precisa’l sou teléfanu, nun tien más que lu pidir que se lu apurro darréu).